Lap ia shibun ki karkhana tyllait maw ba treikam be-ain ha Killing
Nongpoh, Nailur 29 : Ka Khasi Hills Autonomous District Council (KHADC) hynne ka sngi Palei, kala hiar khynra Trading Licence bad Labour Licence ha ki karkhana bapher bapher kiba don ha Ri-Bhoi District, ban pynthikna ba kine ki karkhana bad ki nongbylla bar jylla, kim dei ban pynkhein ia ki ain jong ka Council.
Ia kane ka jingkhynra la lamkhmat da u Executive Member i/c Trace Bah Gigur Myrthong ha ka jingiadonlang u MLA/MDC ka Nongstoin Bah Gabriel Wahlang, MDC ka Jirang Bah Victor Rani, Syiem ka Raid Marwet Bah Ken Syiem lem bad ki OPhisar ka Tnad Enforcement ka Council.
Kane ka kynhun na KHADC kala hiar khynra kyrpang eh ha ka thain Killing halor ka jingioh jingtip ba ki don bun ki karkhana tylliaw maw kiba treikam be-ain nalor ka jingwanrah ia ki nongbylla bar jylla ki bym don satia ia ka Labour Licence.
Ha kane ka jingkhynra, la shem ba ki don bun ki karkhana kiba la khang khyrdep na ka jingioh jingtip ban don kane ka jingkhynra bad don ruh ki karkhana kiba la wan ban kam trai da ki nongshongshnong kiba dei ki Khasi bad ki Garo.
Ka Tnad Enforcement ka KHADC kala khang tala ia kawei ka karkhana tylliat maw bala tip kum ka M/s Concord Stone LLP namar ka jingshem ba kane ka karkhana kam pat don satia ia ka Trading Licence.
Haba iakren bad ki nongthoh khubor, u Bah Gigur Myrthong ula pyntip “Ngi la wan ban khynra ia kine ki karkhana namar ka jingioh jingtip ba bun ki karkhana kim shym la burom ia ki kyndon ain – ka United Khasi Jaintia Trading by Non-Tribal Regulation Act bad kumjuh ruh ki nongbylla bar Jylla ki bym don ia ka Labour Licence”.
“Ngi sngewkhia jur ban lap ia ka jingbym khein kor ki bar jylla kiba wan leh business hapoh ka Jylla bad kane ka long ka jingduhnong kaba khraw ia ka Jylla ha ka liang ka jingioh lum khajna la ka dei ia ka Sorkar Jylla ne ka KHADC” ula ong.
Lah ban pynkynmaw ba dang shen, ka KHADC kala lap haduh 46 tylli ki dukan bar Jylla kiba treikam beain khlem ka Trading Licence hapoh ka thain khappud ka Ri-Bhoi District bad la ai show cause notice ia kine ki dukan ba kin ai jingpynshai hapoh ka 7 sngi lem kumta ka Council kan khang khyrdep syndon ia ki.
Halor ka jingkam trai jong ki Khasi bad Garo ia ki karkhana tylliat maw, u Bah Gigur u pyntip ba la bthah ia kine ki briew ba kin wan pynshisha ia ki kot ki sla jong ki bad lada lap ba ki dei kiba shu kam trai, ka Council kan leh da kaba tyngeh bad ujor ruh ia ki hapoh ka Benami Act.
Une u EM u iathuh ba ka Council kan sa thaw noh shen ia lai tylli ki kynhun khynra Trading Licence sha ki thain Khappud ki ban hiar khynra manka por kata naduh Khanapara terter sha Pilangkata, Umtyrnga bad kiwei kiwei. U ong ba kane ka jingkhynra kan dang iai bteng na ka por sha ka por.
Ha kane kajuh ka sngi, u EM ka Trade u la shong jingialang ruh bad ki bar jylla kiba sengkam hapoh ka thain Khanapara ban tip ia ka jingeh bad ki jingdonkam ka jong ki ha kaba ia dei bad ka jingpynbiang ia ki kot ki sla, ha kaba kum u EM u la bthah ia ki ba ki dei ban bud thik ia ki kyndon ba la buh da ka District Council bad shen yn thaw ruh ia ki lad ki lynti kumno ban pyrkhing ia ki bar jylla ban wan leh business hapoh kine ki thain da kaba kyntu ruh ia ki samla khasi ne ki trai shnong ban mih shakhmat ban sengkam sengjam lade ha ki thain khappud kum ka lad ban long kum ka jingiada ia u pud u sam jong kane ka jylla Meghalaya.
