Nongpoh, Naiwieng 26 : Ka Hynniewtrep National Youth Front (HNYF)-Northern Region hynne ka sngi Ba-ar, kala hiar khynra ia ka weighbridge ha Killing, Ri-Bhoi District, halor ka jingkynnoh ba pyllait ia ka kam khaii maw be-ain sha Assam.
Kane ka jingkhynra kala mih hadien ka jingioh khubor ba bun ki kali kit maw naduh ki mawria haduh ki mawheh, kila ioh iaid lyngba kane ka weighbridge khlem ki kot ki sla bad ka TP ban shalan maw sha Assam, kaba la wanrah ia ka jingduhnong kaba khraw ia ka Jylla.
Ia kane ka jingkhynra la ialam da u President Bah Hesting bad u General Secretary Alfred Malai. Hynrei kane ka jingkhynra kala pulom namar ka jingbym don ki kali ba iaid kit mar, ka jingbym don nongtrei ha ka weighbridge bad ka jingpoi kloi jong ki Pulit bad ki CRPF na Khanapara Police Station ban pahara ha katei ka jaka.
Haba kren sha ki nongthoh khubor, kine ki Nongialam ka HNYF kila kam ba ka seng kala ioh jingtip ba ki kali kit mawria bad mawheh, na ka thain Killing bad ba dei iaid lyngba kane ka weighbridge, ki dei ki bym don satia ia ki kot ki sla ba biang ne ka TP ba kin shalan ia kine ki maw sha Assam.
Ki iathuh ba kat kum ka jinglum jingtip, da ki spah tylli ki kali kit mar ki ju mih na Killing ban pynpoi maw sha Assam.
Kine ki Nongialam ka HNYF kila pynpaw ia ka jinglyngoh ban shem ba ym don kawei ruh ka kali ka ban iaid ha ka por ba khynra ka seng bad ym shym la don nongtrei hi ruh wat ha ka weighbridge, ka ban thew ban who ia ki trok kit maw.
Kila pynpaw ba kane ka jingshem kala pynsuba jur ba imat ka don kaei re kaei sha lyndet. Kila ong ba lada ki bor Sorkar kim khmih bniah ia kane, ka jingduhnong kaba khraw kan long ia ka Jylla.
Ha kajuh ka por, kila pynpaw ba ka seng kan nang tih bniah ia kane ka kam bad kan peitngor bha ruh ia ka jingkit mar jong ki trok na Killing nalor ka jingtreikam jong kane ka weighbridge.
