Panmap bad kular ki trai dukan ban leh licence noh
Nongpoh, Nailar 22 : Ka tnad Enforcement ka Khasi Hills Autonomous District Council (KHADC) hynne ka sngi Palei, kala hiar khang tala syndon ia baroh ki dukan jong ki bar Jylla ba plie be-ain khlem ka Trading Licence ha ka thain Khanapara.
Ki Pulit Enforcement ka KHADC ba ialam da u Inspector Incharge ka Ri-Bhoi Bah F Kharsyntiew, kila hiar khynra Licence kynsan kynsan hynne ka sngi ban ioh bat ia ki dukan jong ki bar Jylla kiba ju leh buit tuh da kaba khang tala ia ki dukan ha ka por ba iaid ka jingkhynra jong ka Council na ka por sha ka por.
Ki Pulit Enforcement kila ioh bat ia bun tylli ki dukan kiba ju mlien ban leh buit tuh bad kila khang tala syndon ia kine ki dukan hadien ba shem ba kim don satia ia ki Trading Licence na ka Council.
Kane ka jingkhynra ka long kaba seisoh bha bad kala pyndem tdong syndon ia ki trai dukan kiba ju ialeh iarieh kum ki khnai bad ka miaw, haduh ba kila hap ban iamih bad panmap na ki Pulit Enforcement nalor ka jingkular ba kin sa aplai noh mar mar ia ka Trading Licence.
Kine ki bar jylla kila pan jingmut ruh na ki Enforcement halor ka kam ban aplai ia ka Licence. Hadien ka jingbatai kaba shai bha, ki Enforcement kila ai notice ia kine ki bar jylla ba ki dei ban pynbiang ia ki licence hapoh ka 10 sngi lem kumta kin ym lah satia ban plie ia ki dukan jong ki.
U Inspector Incharge ka Tnad Enforcement ba khmih ia ka Ri-Bhoi Bah F Kharsyntiew ula bthah ia ki nongkhaii bar jylla ba kim dei ban iarieh ne leh buit tuh haba wan khynra Licence ka KHADC hynrei ki dei ban wan shakhmat ban iakren lada don kano kano ka jingeh khnang ba kin suk hi hadien habud.
Une u Heh Enforcment ula bthah ruh ia kine ki trai dukan ba ki dei ban register ia ki dukan jong ki sha Meghalaya namar ka thain ka dei kaba mar syndah bad ka Assam-kaba ju mih bun ki jingiakajia pud.
