Shillong, Jylliew 23 : U Myntri ka tnad Pule Puthi Rakkam Sangma u la pynpaw ba ka daw jong ka jing hiar kyrdan ka Jylla Mehalaya ha ka Performance Grading Index ki States (PGI) ka dei namar ka jingiehnoh bein ka Jylla ha baroh ki snem bala leit ia ka kam Pule Puthi.
U Rakkam ula kynnoh ba ki Sorkar kiba rim kim shym la shimkhia ban pynkylla bad pynbeit ryntih ia ka rukom pyniaid ia ka kam pule puthi, tei iaki jingtei ba kongsan, pynthikna ia ka jingpoi skul thikna ki nonghikai, kaba la ktah jur bha ia ka kam pule puthi hapoh ka Jylla.
“Ngi hap ban sngewthuh ba ka jingkhein kaba paw mynta ka dei u soh jong ka jingshimkhia ka Sorkar. ha ki 20-30 snem bala leit, ka Sorkar Meghalaya kam shym la leh eiei ban pynkylla lane ban pynbeit ryntih ia ka rukom treikam ha ka kam pule puthi, ban tei ia ki jingtei ba kongsan. Ia ka kam pule puthi la shu ieh ha kine ki 20-30 snem bala leit. Ki Sorkar kim shym la leh eiei ban tei ia ki jingtei ba kongsan, ki jaka pule kim don bording, ym don kamra klas, ki iingskul kiba jot la pei. Ka jingrung skul ki khynnah ruh ka duna bha bad bun ki nonghikai kim ju leit sha skul. Kine kila jia ha kine ki 20-30 snem bala leit” ong u Myntri haba iakren bad ki nongthoh khubor ha ka sngi Nyngkong.
U Myntri ula kdew ba kane ka Sorkar ba mynta kala pyrshang bad shimkhia bha ban pynjanai bad pynbeit ryntih ia ka rukom treikam ha ka kam pule puthi haba iathuh ba palat 2700 tylli ki skul la maramot mynta bad palar 700-800 tylli ki skul kin ioh ia ka building thymmai, ki painkhana, ki smart classroom bad pynthikna ia ka jingwan skul thikna ki nonghikai ha kine ki 2-3 snem bala leit.
U Rakkam ula ban jur ba kine ki sienjam bala shim da kane ka Sorkar ba mynta kan shimpor ban paw ha ka result ne u soh ka jingtreiam, bad ka jingkhein ba shisha kan sa nang kham bha ha kine ki ar ne lai snem ban wan.
Ha kajuh ka por, u Myntri ula kyntu ia ki nongkynthoh pyrshah ba kin phaidien sah ka histori ka jingieh bein ia ka kam pule puthi bad ban shim ia ka jingkitkhlieh halor ka jinglong jingman ba mynta.
“Kumta, mano mano lane kano kano ka party kaba ong lane kaba kynthoh pyrshah ia ka Sorkar,kin hap ban kyrtiang dien, mano ba don ha ka bor ha ki 10-15 snem bala leit noh. Phi dei ban sngewthuh bad phi dei ruh ban shim ia ka jingbahkhlieh namar ki dei ki kam jong phi kiba paw mynta hynrei kaei kaba ngi leh ma ngi mynta kan sa paw u soh lashai lashisngi”.
U Myntri ula kren ruh halor ki jingeh ban ioh ia ka jingkhein kaba beit ia ka rukom pyniaid ia ka kam pule puthi ha Jylla da kaba kdew ia ki jingbun kyrdan ki skul kiba la pynhap lang hapoh uwei u UDI (Unique Digital Identifier).
 ka dei namar ka jingiehnoh bein ka Jylla ha baroh ki snem bala leit ia ka kam Pule Puthi.){kind=link}