Ngi la long kiba kloi ban leh tyngeh lada Mynthi ka sorkar Meghalaya
Nongpoh, Nohprah 14: Ka Khasi Students Union (KSU) hynne ka sngi Balang kala hiar sha ka Shnong Umsaw Lumdorbar halor ka jingioh khubor ba ki Nongialam Shnong jong kane ka shnong khappud, kila shah thwet ha ki Pulit Assam.
Kat kum ka khubor na ki Nongshongshnong ka thain, kane ka jingwan thwet jong ki Pulit Assam ia ki Nongialam Shnong ka long halor ka jingkynnoh ba ki don bynta ha ka jingpynpra ia ki jingker sainar ka Tnad Forest ha ki jaka jong ki Trai Shnong ka Umsaw Lumdorbar, kaba hap hapoh ka Raid Nongtung.
Ka KSU haba bna ia kane ka jingwan leh donbor biang jong ki Pulit Assam bad ka Tnad Forest, kala hiar jrain hynne ka sngi Balang sha katei ka Shnong khappud ban wad jingtip kaba thikna bad ban ai mynsiem ruh ia ki Nongialam Shnong bad ki paid Nongshongshnong ka thain.
Ia kane ka kynhun ka KSU la ialam da u President Rangbah ka Seng samla Lambokstar Marngar, Vice President samla Biangpor Paliar, President ka KSU-North Khasi Hills bah Ferdinald Kharkamni, President ka KSU Eastern Border Area Bah Bajop Maring bad kiwei kiwei.
Kat kum ka jingiathuh ki Nongshongshnong, ka Tnad Forest ka Assam bad ki Pulit dang shen kila wan skud jaka bad ker sainar ia ki jaka jong ki trai shnong ha Umsaw Lumdorbar kaba dang hap hapoh ka Raid Nongtung, bad Bhoirymbong C&RD Block. Ki iathuh ba na ka liang ka shnong kala dep ruh ban ujor pyrshah ia kane ka jingwan kyntur pud jong ka Assam ha Mawlasnai Police Outpost hynrei ka Tnad Forest ka Assam kala pynibor bad ker ia ki sainar khlem ka jingpatiaw iano iano ruh.
U President ka KSU samla Lambokstar Marngar ula pynrem jur ia ka jingsngap mynthi jong ki Pulit ka Jylla bad ka Sorkar Jylla halor kane ka jingjia bad pynpaw ba ka KSU ka long kaba kloi ban shim ia kano kano ka sienjam lada ka Sorkar Jylla kam lah ban ai jingiada ia ki paid Khasi ba shong ha ki shnong Khappud ka Assam, kiba ju mad ia ka jingshah pyndik na ka por sha ka por ha ki Pulit ka Assam bad ka Tnad Forest.
Halor ka jingkynnoh pynpra ia ka jingker sainar jong ka Tnad Forest ka Assam, une u Nongialam ka KSU ula ong “Lada kita ki bor ka Assam ki wan kyntur sha u pud u sam ka Jylla, kum ki paidbah ba sah ha khappud ki dei ban iatylli lang kawei bad ki dei hok ban iakhun wat da ka bor ban iada iala ka jong ka hok”.
U samla Lambokstar u pyntip ba ka KSU kan sa leit ban iakynduh ia ki bor pyniaid district ka Ri-Bhoi lashai ka sngi ban iakren halor ki jingeh jong ki paidbah ha khappud bad ban dawa tohkit ruh ia kaei kaba jia ha Umsaw Lumdorbar.
“Ngin dawa ruh ban phah ia ki bor pahara kiba khlain ha katei ka thain khappud ban ai jingiada bad jingshngain ia ki paidbah. Lad aka Sorkar ka mynthi ban ai bor pahara, ka Seng kam banse ban shim da kiwei ki lynti ba tyngeh” ula ong.
Ula ai mynsiem ia ki nongshongshnong ka thain da kaba ong ba ka KSU kan iai don ha syndah miet la bad sngi bad ki paid nongshongshnong jong ki shnong khappud ka Jylla.
