Shillong Nailar 18: Ka Khasi Students’ Union (KSU) ka East Jaintia Hils District Unit, ha ka sngi saitjaiñ kala hiar jurip ia ki shnong khappud ka East Jaintia Hills bad ka Bangladesh bad iakynduh ia ki Dorbar Shnong ha kaban lah tehlakam ia ka jingrung tuh jong ki nong Bangladesh, kiba wan phet na Bangladesh.
Ki Dorbar Shnong kiba ka KSU ka iakynduh ki kynthup ia ka Shnong Lejri, Lahalein, Huroi bad Hingaria. Ka KSU kala leit jurip ruh ia ka jingker sainar ha ka shnong Lailong.
“Ka jingleit jurip jong ngi ka long ban ai mynsiem ia ki Dorbar Shnong ba kin pyrkhing ia ka jingwan rung be-ain ki mynder na Bangladesh” ong u Publicity Secretary ka KSU EJHD samla Hamewanpynhun Ryngkhlem ha ka kyrwoh khubor.
Ka KSU kala pynlong ia ka jingialang ha ka shnong Huroi kaba la wan iashimbynta da baroh saw tylli ki Shnong kiba la wan mihkhmat da ki Waheh Shnong bad Secretary Shnong nalor ki lai tylli ki shnat treikam ka KSU ba kynthup ia ka Lejri Unit, Huroi Unit bad Hingaria Unit.
U Samla Hamewanpynhun iathuh ba ha ka jingiakren bad ki Dorbar Shnong, la sngewthuh ba ka jinglong jingman ha ki thain Khappud ki dang biang hynrei ka shu don tang ka jingjynjar ha ka kam khaii pateng. La pyntip ruh ba ki don ki briew kiba kangar sbai rupa, kiba la iarap ban pynrung tuh ia ki nong Bangladesh na ka thain.
U pyntip ba kala don ruh ka jingud jingnam ia ka jingdon ki BSF ha Hingaria namar ki BSF kiba dei ban don ha khappud, kila don pynban sha surok shnong kaba jngai kumba 3 ne 4 km na khappud.
Ha kane ka sngi, ka KSU kala leit ruh ban jngoh ia ka Huroi Border Outpost bad ka Lailong Border Outpost bad ioh iamir jingmut bad ki heh BSF hashuwa ban leit jurip ia ka jingker sainar ha khappud.
“La pyntip ba haduh mynta, kam pat don satia ka jingwan rung tuh hynrei ka jingpeit pyrman ka long kaba pyrrkhing bha. Ia ki briew ba pynrung tuh ia ki nong Bangladesh ruh, lada lap, yn leh da kaba tyngeh ia ki kat kum ka ain” ong ka KSU.
U samla Hamewanpynhun ula pyntip ba ka KSU-EJHD ha kine ki sngi ban wan, kan sa leit hiar ruh sa sha kiwei ki shnong khappud ba kynthup iaka Kuliang, Donaskur, Dona Umbluh Ampyrdit, kiba dei ki jaka kiba laitlan bha ia ki nong Bangladesh ban wan rung lyngba ka jingiarap ki dalal.
Haba maham ia ki paradoh parasnam ha khappud ba kim bit ban leit rung shabar ka jingker sainar ha khappud, une u nongialam ka KSU ula ong “ Kat kum ka jingiathuh ki BSF, ki Bangladesh Border Guard (BGB) kila ioh jingbit ban siat beit kat ia kiba tam ia u pud. Na ka liang ki Border Security Force (BSF) jong ka Ri India ruh kila ioh jingbit ban siat beit ia ki nong Bangla lada ki tam shapoh u pud jong ka Ri”.
