Shillong, Nohprah 05 : U Lamphang ka Iingdorbar Thaw Ain Thomas A Sangma, hynne ka sngi Ba-ar, ula hiar jurip ia ka jingtei jong ka Iingdorbar Thaw Ain ka Thymmai ha Mawdiangdiang bad ula buh ia ka thong ban pyndep noh ia kane ka jingtei hapoh u bnai Nailar 2024 ban ioh pynlong ia ka Dorbar Synrai.
U Lamphang ula lum ruh ia ka jingialang bishar kam halor ka jingiaid ka jingtei bad ki Ophisar na ki Tnad bapher bapher ka Jylla ha ka jingiadon ryngkat u Symbud Lamphang Timothy D Shira bad u Commissioner & Secretary ka Meghalaya Legislative Assembly Bah Andrew Simons.
Hadien bala dep jurip ba shong bishar kam, u Lamphang ula pynthikna ia ka jingbuh jingmut ban pyndep noh kham kloi katba lah ia kane ka project.
Ula pyntip ba la dep buh ia ka por ban pyndep ia kane ka jingtei hapoh u bnai Naitung lane Nailar 2024 da ka jingthmu ban lah pynlong noh ia ka Dorbar Synrai ha kane ka Iingdorbar Thaw Ain ba thymmai ka Jylla.
Haba kren ha ka jingialang, u Lamphang ula ong “Ngi khot ia ki Tnad bapher bapher kynthup ia ka PHE ba kan kitkhia ia ka jingpynpoi um hapoh ka complex, ka Social Forestry ban pynitynnad ia ka phyllaw bad sawdong sawkun, ka Tnad Arts & Culture ka ban pynitynnad ia ka rup ka rong kaban long nala tynrai jong ka Assembly, ka Tnad IT bad NIC”.
Halor ka jingshna ia u dome, u Lamphang ula pyntip ba baroh ki lyngkhot lyngkhai na ka jingtwa la dep ban pynkhuid lut bad ka jingbuh lain ia ka jingtei kala iaid shaid shaid. Ula pyntip ba ia u dome ba thymmai yn tei noh da kaba pyndonkam ia ki prefabicrated steel ki ban sa poi ha une u bnai ba mynta bad Kyllalyngkot. La khmih lynti ba ka jingpyndait ia kine ki steel kan sdang ha u Rymphang bad yn dep ha u Iaiong.
Nalor kane, ula pyntip ba ka jingtei ia une u dome ba thymmai kan dei kaba khmih lang da ka IIT Guwahati bad IIT Roorkee.
Haba kren halor ka Phase-II jong ka project, u Lamphang ula pyntip ba ka Ministry of Development of North East Region (DoNER) kala ai jingkular, ban bei pisa ia ka Phase-II bad ka jingpynkhreh ia ka Detailed Project Report (DPR) kala iaid shakhmat.
