Shillong, Naitung 09 : Ha ka jingjurip ba kyndit kyndit, u Symbud Myntri Rangbah Bah Sniawbhalang Dhar, uba khmih ia ka Tnad Urban Affairs, ula leit jurip ia ka Khyndailad ha ka miet sngi Balang, ban peit thuh ia ka jinglong jingman jong kane ka jaka khaii kaba don hapdeng eh ka Sor Shillong.
Kane ka jingjurip ka long eh ban peitthuh ia ka jingshngain bad ka jinglong jingman ha ka por mynmiet ha ka thain, kaba la kylla long ka jaka ba khring bha ia ki nongwan shangkai pyrthei.
Ha kane ka jingjurip, u Bah Sniawbha ula ioh iakren ia ki nongshong dukan madan bad ki riew paidbah, kynthup ki nong wan shangkai pyrthei, kiba dang ia muja ban bam ia ki jingbam ba shet hi dalade.
U Symbud Myntri ula thied bad mad ruh ia katto katne ki jingbam surok kiba don ha ka thain.
U Bah Sniawbha ula ban jur ba ka jingdon jong ki briew ha Khyndailad ha ka por mynmiet ka dei ka sakhi ia ka nam ba ka Shillong bad ka Jylla Meghalaya ka dei ka jaka kaba shngain bha. Ula iaroh ba ki nongshongshnong bad ki nongshangkai pyrthei ki sngew shngain ban lehkmen ha ka por mynmiet.
U Symbud Myntri Rangbah ula sngewkmen ban iohi ia ka jingshaniah jong ki paidbah ha ka Sorkar da ka jinglong ba kloi jong ki ban iamih bad iaid kai sngewbha ha ka por mynmiet. U ong ba kane ka dei ka dak ba pyni ia ka jingpyrshang jong ka Sorkar ban tehlakam ia ka shongsuk shongsain hapoh ka Jylla.
