Shillong, Iaiong 27 : U Myntri Rangbah ka Jylla Conrad K Sangma hynne ka sngi Palei, ula hiar jurip ia ki project ba dang pyntrei shaid shaid mynta ha sor Tura bad ki jaka ba marjan ba kynthup ia ka Tura Medical College, kaba la sahteng la slem bha ha ka shnong Doldegre.
Haba bishar kam halor ka jingiai ka jingtei bad ki Ophisar ka Tnad ka Koit ka Khiah, u Deputy Commissioner ka West Garo Hills bad ki Heh jong ka Kompani ba pyntrei ia ka project, u Myntri Rangbah ula pynpaw ba ka jing iaid jong ka jingtei ka long kaba suki bha, ia kaba la pynsted noh dang shen.
“Ka jingtei jong ka Civil Work jong ka College ka dei ban dep noh hapoh u bnai Jylliew-Naitung u snem ban wan. Ngi kyrmen ban pyndep noh ia ka jingtei bad ban pynsdang noh ia ka Medical College. Ka jingpynkhreh ban pynbud ia ka jingthiah ha Tura Civil Hospital ruh kan sa sdang noh shen” bynrap u Myntri Rangbah.
U Myntri Rangbah ula bthah ruh ia u Deputy Commissioner Jagdish Chelani ban pynlong ia ka jingialang bishar kam ba man ka por bad ka kompani ba pyntrei ia ka project bad ban pynthikna ruh ba kane ka college ka dei ban dep noh hapoh u snem ban wan.
Ha kane ka sngi, u Myntri Rangbah ula leit ruh ban jurip ia ka jingtei jong ka Tura Youth Convention Centre kaba dang iaid shaid shaid ha ka jingtrei, kaba la pynieng hapoh ka shong Dakopgre bad ruh ia ka Track bad Field Stadium.
Haba pynpaw ia ka jingkmen halor ka jingiaid ki jingtei bad iadei bad ki kam ialehkai lem bad ki samla, u Conrad ula ong “Ngi khmih lynti ba hapoh 1.5 snem, ngin sa plie noh ia ka Stadium bad ka Convention Centre. Kine ki jingtei kin long ka jingkyrkhu ia ka sor Tura bad ka Jylla baroh kawei namar ki jait jingialehkai bapher bapher bad ki lympung ialehkai ka Jylla bad ka Ri, kin dei kiban sa lah pynlong ha Tura ha ki snem ban sa wan”.
