Shillong, Naitung18 : U Myntri Rangbah ka Jylla Conrad K Sangma ha ka sngi Nyngkong, ula hiar jurip ia ka surok bala shna pynheh ba pyniasoh ia ka Mairang-Ranigodown-Azra, Assam, kaba dei ka surok kaba kongsan bha bad kaba shakri kum kawei pat lynti iaid ban poi sha Nongbah Guwahati bad ka Kad Liengsuin Guwahati lyngba ka Mairang.
Ka surok Mairang-Ranigodown-Azra kan dei kawei pat ka surok kaban pyniasoh ia ka Eastern West Khasi Hills bad ka Ri-Bhoi District shaduh sha Kad Liengsuin Guwahati bad ruh sha Nongbah Guwahati. Kane ka surok ka long kaba kongsan bha lada jia ryngkat ba jur ka dheng kali ne shah khang lynti iaka surok NH-6 ba pyniasoh ia ka Shillong sha Guwahati.
Haba kren halor ka surok, u Myntri Rangbah ula pynkynmaw ia ka por ba u dang dei u Nongialam ka Liang Pyrshah ha Iingdorbar Thaw Ain ka Jylla ha u snem 2010-2011 kaba ula ban jur ban tei pynbha ia kane ka surok khnang ban pynsuk ia ka leit ka wan.
“Nga kynmaw ha u 2010-2011, ha ka por ba nga dang long u Nongialam ka Liang Pyrshah, nga la kren ia kane ka surok bad nga la kyntu ia ka Sorkar ha katei ka por ba kan trei pynbha ia kane ka surok namar ka Jylla ka donkam sa kawei pat ka surok ba pyniasoh sha Assam” ula ong hadien ba dep jurip ia ka surok, kaba la dep ban trei pynheh mynta.
“Ha u snem 2018, haba ka thaw Sorkar ma ngi, ngi la shimkhia bha ia ka project ban pynheh bad pynbha ia kane ka surok. Nga kmen palat ban iohi ba kane ka surok kala dep mynta. Kane ka dei ruh ka jingkular ba ngi la ai sha ki paidbah ha ka por elekshon bad ngi la lahban pyndep ia kane ka surok mynta” ula bynrap.
Halor ka jingkongsan ka surok bad ki jingmyntoi ba kan ai ia ka Jylla, u Myntri Rangbah ula ong “Kumba phi iatip, ka jingpyniasoh surok ka dei ka jingplie lynti ia kano kano ka kam pynroi ba kan wan….mynta ba kala dep, kane ka surok kan plie ia shibun ki lad ba ki kam khaii pateng kin jia, ka lad ban kyntiew ia ka kam jngohkai bad ruh ha kiwei ki kam ba kin mih”.
U Myntri Rangbah ula pyntip ruh ba ki Satellite Cities kin sa mih ha kane ka surok ha ki snem ban sa wan,ki ban long marjan ka Nongbah Guwahati bad ka Kad Liengsuin. “Naba kane ka surok ka lam beit beit sha Kad Liengsuin bad sha Nongbah Guwahati, kumta ka jaka bad ki thain ba marjan ka Guwahati bad Kad Liengsuin kin sa iohi kham bun ki kam pynroi ha ki snem ban sa wan namar ngin hap ban pynmih ia ki satellite citied ha kaba ngin lah ban pynkha ia ki Zone bad ka jingdon marjan ka Guwahati kan dei ka kabu ia ngi” ula ong.
Haba pynpaw ia ka jingsngew hun halor ka jingtei pynheh ia ka surok, u Myntri Rangbah ula pynkynmaw ia ka jinglong kongsan na ka bynta ka Jylla bad ki Nongshongshnong. Ula ong “Haba nyngkong, ka dei ka jingpyniasoh sha ki paidbah, kaba ark a dei ka lad kamai kajih ka ban sa plie lynti ym tang ia ki paidbah ka thain hynrei jong ka Jylla baroh kawei bad kaba lai bad ba kongsan eh ka dei ba kane ka surok kan shakri kum kawei pat ka lynti iaid sha East Khasi Hills bad sha kiwei ki bynta jong ka Meghalaya”.
Pule ruh: Assam : Lynshop ka jingpang Dengue ha Karbi Anglong, kot 90% kiba iabit ia ka jingpang
