Shillong, Jymmang 17 : U Myntri Rangbah ka Jylla Conrad K Sangma ha ryngkat ka Myntri ka rep ka riang Kong Ampareen Lyngdoh, hynne ka sngi Balang kila hiar jurup ia ka prokram pynmih symbai phan bala ai kyrteng ka “Seed Secure Meghalaya’ ha Bio Resource Development Centre (BRDC), Upper Shillong.
Ka “Seed Secure Meghalaya” ka dei kaba la wanrah da ka Sorkar Jylla da ka jingthmu ban kyntiew ia ka jingpynmih symbai phan bad ka jingrep phan ha ka Jylla bad ban die ia ki phan kiba kynsai sha ki Iew kiba don ha kylleng ki Jylla ka thain Shatei Lam Mihngi bad shabar.
Ia kane ka project la pyntreikam da ka International Potato Centre (CIP) ha ryngkat ka jingiatreilang bad ka Meghalaya Basin Management Authority, ka Tnad Horticulture bad ka Central Potato Research Institute, Shimla.
Ha BRDC, ki Heh Sorkar kila ai ka jingbatai halor ka Apical Rooted Cutting (ARC) kaba la pyndonkam ha kaban pynmih ia ki symbai phan lyngba ka tissue culture plantlets.
U Myntri Rangbah ula ong ba kane ka buit stad saian ka dei kaba la wanrah ban pynthikna ba kan kham pynmih bun ia u phan nalor ka jingbha u phan. Ula pyntip ba ka Sorkar kala iatreilang bad ki Nongrep ban pyni ia ka jingiapher hapdeng ka rukom thungkam jongka juk barim bad kane ka juk ba mynta lyngba kane ka pilot project.
Ha kane ka sngi, u Myntri Rangbah ula leit jurip ruh ia ka Kyrdemkhla Integrated Cooperative Society (IVCS) ha Upper Shillong ban ioh iakren bad ki nongrep kiba la pyntreikam ia ka ARC kiba la kem bad u soh ba ki ioh kata ka jinglah pynmih bun ia u phan.
Hapoh kane ka project, haduh 150 ngut ki nongrep kila ioh ia u symbai Kufri Jyoti bad Himalino, 500 ngut ki nongreo kila ioh jinghikai halor ka Integrated seed Health Management bad Storage, 2 tylli ki tissue culture laboratory bala pynieng bad ka jingleh ia ka GIS mapping ia ka jaka ba heh 15146 hectare ban thung phan.
