Shillong, Jymmang 06: U Myntri Rangbah ka jylla u Conrad K. Sangma ula leit jurip ia ka jingpyntreikam ia ka Waste Segregation Machine ha Rongkhon Songgital ha Tura, West Garo Hills ha ka jingiadonlang u Myntri ka tnad PHE u Marcuise Marak bad u Chairman ka MUDA u Bah Wailadmiki Shylla.
Hadien ba la dep buh ia katei ka machine, yn sa pyndonkam ia ki kali puh shilum ha kaban khat ia ki niut na ka jaka lum niut bad yn sa phiah ia ki niut ha ki lai bynta kiba kynthup ia ki niut kiba lah ban kylla sboh, ki niut kiba lah ban kem ding kloi bad ki niut ki bym lah ban pynkylla sboh kum ki tin, plastic bad kiwei kiwei.
U Conrad K. Sangma ula ong, “Ia ki niut ki nier yn sa pynia khlad da kaba pyndonkam da ki kor teknoloji, ia kaba yn pynkylla pat ia ki kum ki sboh bad kiwei kiwei ki mar”
Ula kdew ba ia ki kor teknoloji kiba la pyndonkam kidei kiba la dep ban pyrshang bad pyntreikam bad ula ai nuksa ia ka jaka lum niut ha Marten, Shillong bad ha Tinsukia, Assam.
“Ngi ngeit skhem ba da kaba pyndonkam da ki kor teknoloji, ngin lah ban shimkhia ban leh eiei halor ka jingdon ki niut ki nier kiba la pynlang ha kylleng ki jaka jong ka jylla” ong u Myntri Rangbah.
Ula pyntip ruh ba ka sorkar kala bthah ia baroh ki Tnad Municipal ha ka jylla ba kidei ban pynthikna ba ka dei ban don ka jingpyniakhlad ia ki niut naduh ki iing k isem bad ha ki shnong ki thaw khnang ba kan pynsuk ia ka rukom lum ia ki niut ha kip or ban wan.
