Amlarem, Naiwieng 10 : U Myntri Rangbah ka Jylla Conrad K Sangma, ha ka sngi Nyngkong, ula hiar jurip ia ka jingtei kaba dang iaid shakhmat jong ka madan Artificial Turf ha ka shnong Ladjaplem, Amlarem bad pynpaw ia ka jinghun ia ka jingiaid beit iaid ryntih ka project.
La synran ia u Myntri Rangbah da u MLA ka thain bad Myntri ka Tnad Pule Puthi Bah Lahkmen Rymbui lem bad ki Ophisar ka Tnad Sports, u District Sports Officer (DSO) ka West Jaintia Hills Bah Khroobok Passah lem bad ki dkhot ka Amlarem Sub-Divisional Sports Association (ASSA).
Ha kane ka jingjurip, u Myntri Rangbah ula ai ka jingiaroh ia ka rukom shna bad rukom pynwandur ia ka madan phutbol haba pynpaw ba kum kine ki madan ialehkai la shna ruh ha kylleng ka Jylla hapoh ka prokram ka Sorkar ban kyntiew ia ki kam ialehkai.
Ula pynpaw ia ka jingkyrmen ba ka project kan sa dep noh shen bad kan ai ka lad ia ki samla ka Amlarem bad ki jaka ba marjan ba kin kilan met ialade bad iashimbynta ha ki lympung ialehkai ki ban sa pynbeit ha ka thain.
U Myntri Rangbah ula ban jur ruh ia ka jingkut jingmut jong ka Sorkar ban pynshlur ia ki kam ialehkai, ban kyntiew ia ki samla bad pyniadonbynta ia ki shnong ki thaw, haba ban jur ba kum kine ki jaka ialehkai kin saindur ia ki sap bad pynkhlain ia ki kam ialehkai ha ka thain.
