Shillong, Risaw 26 : U Myntri Rangbah ka jylla u Conrad K Sangam hynne ka sngi Balang, ula leit jurip iaka Cancer Wing jong ka Shillong Civil Hospital ban peit iaka jinglong jingman ha kane ka jaka ai jingsumar kaba la khmih lynti ban plie biang noh ha u bnai Nohprah.
Inspected the ongoing improvement of the Cancer Wing of Civil Hospital, Shillong. The Cancer Wing was previously used as Covid Ward during Covid times & certain renovations had to be made to house the cancer patients. @mansukhmandviya @MoHFW_INDIA pic.twitter.com/E1NJmYst17
— Conrad Sangma (@SangmaConrad) October 26, 2022
“Ka jingwan jurip ka jong nga, ka long ban peit iaka jingpyntrei iaki kam ha ka Cancer Wing namar haka por ba wan shaphriang ka khlam COVID-19, la pyndonkam ia kane ka jaka sumar kum ka COVID Centre…. kumta ka long kaba donkam ban pynkylla bad ban pynbha ia ki katto katne ki bynta jong kane ka jaka sumar” ong u Conrad.
U Myntri Rangbah ula pynpaw ruh ba u dap da ka jingsngewkmen ban iohi ba ka jingpyntrei iaka kam kala iaid shaid shaid bad la khmih lynti ba ha ka taiew ba nyngkong jong u Nohprah yn pyndep noh ia ki jingtei bapher bapher kiba iadei bad ka lain ‘Civil’ bad la khmih lynti ba yn pyntreikam pura noh ia kane ka jaka ai jingsumar ha u Nohprah mynta u snem.
Halor ki tiar ki tar, u Conrad ula pyntip ba kan dang shim por ha ka jingpynpoi ia ki tiar ki tar kiba thymmai namar ba hap ban pyndep ia kiba bun ki kam bad ia mynta hi yn pyndonkam shwa da ki tiar ki tar kiba la don lypa.
Ula pyntip ba ki Ward kiba la don lypa naka bynta ki kynthei bad shynrang ki long kiba la dep ban pynkhreh nadong hadong.
Ha kane ka jingleit jurip la iadonlang u Jt DHS (Surgeon Superintendent) Civil Hospital Shillong u Dr Andreas Dkhar, ki heh ophisar jong ka tnad ka koit ka khiah bad kiwei kiwei.
