Shillong, Nohprah 03: Namar ka jingujor palat halor ka jingsniew ka surok bad ki nala nalor ka jingpei ki pipe um ha surok Them Iew Mawlong, u MLA ka Shillong South Constituency Bah Sanbor Shullai, ula hiar juip ia kane ka thain ha ka sngi Saitjain.
U Bah Sanbor ula jurup ia ka surok naduh Anjali Petrol Pump shaduh sha Them Iew Mawlong ha ryngkat bad ki Ophisar ka Tnad PHE, PWD, Shillong Municipal bad ka Shillong Traffic Police.
U Bah Sanbor ula pynpaw ba ka jingjurip kala pynpeitmat shisha ia ka jinglong shngain jong ki nongleit nongwan namar ka jingsniew palat jong ka surok. Ki lynti iaid ruh ki dei kiba jot bad ba shlei um namar ka jingbym biang ki nala.
U Bah Sanbor ula pyntip ba ka Sorkar Jylla kala dei mang T.1.63 klur sha ka PWD ba kan shna pynbha ia ka surok na Anjali Petrol Pump sha Them Iew Mawlong. Hynrei, shuwa ban sdang ka maramot, ka PHE, Shillong Municipal bad ka Shillong Contonment ki dei ban leh eiei ia ka jingpei ki pipe um ha shilynter ka surok.
“Ha ka jingjurip, ngi la lap ia ki jingpei ki pipe um jong ki katto katne ki longiing bad katto katne jong ka Shillong Contonment. Ha ka 4 tarik Nohprah, ngin sa shong iakren bad ka Contonment ban iapynbeit ia kane ka jingpynbha ia ki pipe um” ula ong.
U Bah Sanbor ula ong ruh ba ka jingmaramot ia ka surok kan sdang tad hadien bala dep shna pynbha ia ki pipe um ban pynthikna ba kim dei shuh kiba pei um. Ula kyntu ia ki nongshongshnong ka Them Iew Mawlong ba kin iatreilang bad ki Tnad ba dei khmih khnang bay n lah ban pyndep kloi ia ki kam maramot.
