Shillong Nohprah 11: U MLA ka South Shillong Constituency u Bah Sanbor Shullai hynne ka sngi Balang ula leit jurip ia ka surok ba dang shna-kaba pyniasoh na Rilbong sha Jingkieng Umshyrpi, ha ka jinglut jingsep kaba kot T. 5.60 Klur.
Ha katei ka jingjurip la iadonlang ki heh ophisar ka tnad PWD Roads, ki heh pulit bad ki nongialam shnong ka thain bad ki nongshong shnong
Kane ka surok ka dei kaba sdang na ka jaka kaba don markhap bad ka Iingdorbar thawain ka jylla kaba dei ka jaka jong ka Tnad Arts and Culture, ban mih ruh sha lyndet jong ka iing dorbar thawain ban poi ha ka jaka kaban pyniasoh bad kawei pat ka surok kaban mih shaduh ka Jingkieng Umshyrpi.
U Bah Sanbor Shullai ula ong ba kane ka surok kan long ka jingmyntoi ia ki 8 tylli ki Dorbar Shnong, ban pynsuk ia ka leit ka wan ka jongki paidbah khamtam kito kiba leit jingleit.
Ula ong ba hadien bala dep shna ia kine ki surok ne Link Road kiba thymmai kan iarap shibun ban pynduna iaka jingdheng kali bad kan pynsuk ia ka leit ka wan ki paidbah ka thaiñ Laban baroh kawei.
Ula iathuh, ba ka jinglut baroh na ka bynta ka jingshna ia kane ka surok bad ka jingkieng ka kot 5.60 klur tyngka bad ka jingtrei mynta ruh kala iaid shakhmat bad la khmih lynti ban pyndep noh ha u bnai Rymphang 2025.
Ula kyntu ia ka tnad PWD ba kan ialeh ban shna kloi ia kane ka surok na ka bynta ka bha ka miat jong ki paidbah.
