Shillong Nailar 29: U Chief Executive Member ka Khasi Hills Autonomous District Council Bah Pyniaid Sing Syiem hynne ka sngi Baar ula leit jurip ia ka Parking Lot, Khliehiewduh bad ia ka Iewduh ban peit ia ka jinglong jingman bad khamtam eh iaka jingkhuid jingsuba jong ka Iewduh.
Ha katei ka jingjurip la iadonlang ka Executive Member ka tnad Market ka Kong Grace Mary Kharpuri, u Executive Member ka tnad Development u Bah Carness Sohshang, u Majistor ka East Khasi Hills u Bah Ronnie Wahlang, u Syiem ka Hima Mylliem u Paiem Ainam Manik Syiem bad kiwei kiwei.
Ha kaba iadei bad ka jingjaboh ka Parking Lot ha Khliehiewduh, u Bah Pyniaid Syiem ula pynpaw iaka jingbynniaw halor ka jingjaboh shaba palat jong kane ka jaka pynieng kali kaba la buh ha ka jingeh iaki paidbah kiba leit ba wan ha kane ka jaka pynieng kali.
U pyntip ba ula dep bthah ruh ia ki ophisar jong ka MUDA ba kidei ban pynkhuid noh ia Parking Lot bad ban buh ia ka ‘Light’ khnang ba kan ai jingshngain ia ki nongrung nongmih hapoh jong ka Parking Lot bad ban tehlakam ia ki kam tuh kam lute.
U Bah Pyniaid ula iathuh ba na ka liang ka tnad MUDA kala pynpaw ba kan sa leh ia katei lyngba ka Smart City Project.
“Haba ka tnad Urban ka aiwai ia ki jaka pynieng kali sha ki riewshimet kadei ban don ryngkat bad ki kyndon bad kam dei ban shu aiti beit kumto khlem ka jingbuh ia ki kyndon ne jingbthah. Ngin sa phah da ka jingthoh sha u Director ka tnad Urban Affairs bad sha ka MUDA ba ha ka jingaiti ia ki Parking Lot, kidei ban buh ia ki kyndon ban don ka khuid ka suba” ong u CEM ka KHADC.
Ha kaba iadei bad ka jingjaboh jong ka Iewduh, u CEM ula ong ba ka Council kan sa ai artylli ki kali kit niut ia ka Hima Mylliem na ka bynta ban lum ia u niut na ïewduh namar kumba long mynta ka Hima Mylliem ka don tang artylli ki kali kiba lum ia u niut ha ka iew baroh kawei.
U CEM ula kyntu ia ki paidbah bad ia ki nongshong iew ba kidei ban ialeh ban pynneh iaka khuid ka suba haka iewduh bad kidei ban bret ia ki niut ha ki jaka bret niut khamtam haba kadei ka jaka kaba ki briew na kylleng ki wan ban jngohkai.
“Ka KHADC kan sa pynlong iaka Awreness prokram ha ki shnong, ki skul bad ki Iew bad mynta ka Council kala khot iaka Expression of Interest ia ki kompani kiba nabar kin buh iaka Processing Plant naka bynta ka Solid Waste ha ka ri jongngi. Ngim donkam iaka jaka da ki spah Akar hynrei ngi donkam tang kumba 20 akar ka jaka na ka bynta ban tylliat ia ki niut ki nier” ong u CEM ka KHADC.
Ha kane ka sngi u CEM bad ka kynhun kila kynduh ruh ia ki nongialam shnong na ki shnong ba marjan ban iakren ha kaba iadei bad ka jingkhuid jingsuba.
U Bah Pyniaid ula ong ba ka Council kan sa thaw ia ka komiti ha kaba iadei bad jingkhuid jingsuba bad ka jingshngain jongki paidbah da kaba iatreilang bad ki nongialam shnong khnang ba kin ioh iatai bad ban shim ia ki sienjam.
