Shillong Jymmang 19: Ka JJM Nichol’s Roy Memorial Committee hynne ka sngi kala hiar jurip iaka Madan Kyndong kaba don ha lyndet jongka Nabon Womens College, Mission Compound, Shillong, da ka jingthmu ban tei noh da ka Sports Complex ha kane ka jaka.
Katei ka kynhun hapoh ka jingialam u Bah Ransom Sutnga uba long u Chairman ka JJM Nichol’s Roy Memorial Committee, kala leit jurip kadei da ka jingthmu ban pyndonkam biang ia kane ka madan kaba la shu iehshrah mynta la bun snem bad ban pynbha noh iaka da kaba tei iaka Sports Complex ban ioh pynlong ia ki jingialehkai ki bapher.
U Bah Sutnga ula ong, kane ka madan kala don naduh u snem 1969 hynrei la shu ieh shrah da ki phew phew snem kaba la pynduhnong iaka Committee bad khamtam eh ia ki nongialehkai hynrei mynta ki dap da ka jingkmen ba u Myntri Rangbah ka jylla u Conrad K Sangma ula mang T.10 Lak lyngba ka CM Special Development Fund ban pynbit bad pynbha ïa kane ka madan.
Ula ïathuh ba ka jingheh jong kane ka madan ka long kumba 52 hajar square feet bad tang ailad ka bneng kin sdang noh ïa ka kam ban pynbha ïa kane ka madan, khamtam haba ka committee kala dep ïoh ka pisa ha ka wat kaba nyngkong kaba long T.5 lak na ka skhim jongu Myntri Rangbah ka jylla.
