Shillong, Risaw 31: Ka Hynniewtrep Youth Council ryngkat bad ki Engineer jong ka tnad PHE bad PWD hynne ka sngi, kila leit jurip iaka jingsniew ka surok haka thaiñ Mawlai kaba la pynthud iaka leit ka wan jong ki paidbah namar ka jingpyniaid ia ki pipe um na ka surok.
Kane ka jingjurip kala sdang na lad Food Corporation of India (FCI) ter ter shaduh Mawlai Petrol Pump ha kaba ki Engineer jong ka tnad sorkar kila sakhi da la ki jong ki khmat iaka jingsniew shaba palat pud jong ki surok namar ka jingmih ka um lyngba ki pipe um bad ka jingbym ioh ban maramot ne ban siang rong ia ka surok namar ba ka tnad PHE kam pat dep ban pyndait lut iaki pipe um kiba heh lyngba ka skhim sam umbam umdih Greater Shillong Water Supply Scheme.
U Nongialam ka HYC Mawlai Circle u Bah Donboklang Kharlyngdoh u la ong ba ka daw kaba la pynlong ban jurip ia kane ka surok kadei namar ka jingud jingnam jong ki paidbah halor ka jingsniew shaba palat pud jong ka surok kaba la pynthud iaka leit ka wan la kiba shong da ki kali ne wat ia kiba iaid da ka kjat.
“Ngi la kyntu ia kitei ki tnad sorkar ba kin pynkloi noh ia ka kam bad ban shna noh iaka surok bad ngi khmih lynti ba ia kane ka surok yn shna pyndep noh ha u Nohprah mynta u snem” ong u Bah Donboklang.
U Executive Engineer Investigation jongka PHE u Bah Shaun Booth ula ong, “Nga lah kylli ia i Bah (nongialam HYC) myntan bad nga la ong ban ai noh da u kontraktor jong i ban ioh sdang noh ia ka kam, namar nga dang iohi mynta ba ka long kumne, ba ka don ka jingtuid kai jongka um katne katne. Ngi la ia puson bad pyrkhat bad in sa ai kyrteng ha nga ban phah trei noh ha u, namar ka jingtrei jong u briew uba dei ban trei ia kane ka jingtrei kam long kaba itynnad”.
Ula ong, ba ula btah ia u kontraktor ban leh ia ka ‘Wielding’ bad ka lah ban dei ba ki pipe kila rim bad ia ka rukom pynshong iaki pipe ruh kila mih noh shabar bad ka jingiaid kali sharum shaneng kala pynsniew iaki pipe bad kala lait kai ka um.
Haba kylli haduh katno kan shim por ban maramot iaki pipe kiba laitkai ka um, u Bah Booth ula ong, kan ym shim por lada i bah i lah ban ai noh ia ka kyrteng jong u kontraktor bad yn sa khot noh da kawei ka tender ban trei ia katei ka kam.
Une u Executive Engineer ula ong, ba kadei ban don ka lad ka lynti ban ‘Blacklist’ ia une ne uno uno u kontraktor u bym trei thikna iaka kam.
Katba ka Junior Engineer jong ka GSWSS ka Kong Iba Wahlang kala ong ba uwei u kontraktor ula dep ban thep ia ki pipe um kiba iaid lyngba ka surok bad mynta yn hap ban pynbha noh ia ki bynta jong ka surok, katba uwei pat u kontraktor yn hap ban maramot shwa iaka jingpynsniew iaki pipe um jong ka tnad Investigation bad yn hap ban pyndep ia ki kam kiba dang sah.
Kala ong, ba ka jingsuki ban pyntrei iaka projek GSWSS kadei namar u slap, kaba la pynbor ban hap pynsangeh noh iaki kam ki jam bad la shem ruh ba ki bun palat ki pipe um ha ka thain Mawlai Petrol Pump kiba iaid lyngba ka surok ha kaba la hap ban shu tih hi da u briew bad haba pyntrei da ka JCB la kum jynrat noh ia ki pipe um bad kumta kila hap ban maramot shwa ia ki pipe kiba la julor bad ym shim la shah ban pyniaid shakhmat iaka kam katba ym pat dep ban maramot ia ki pipe kiba la sniew.
“Mynta te nga tharai ba kan slem shuh namar ba ka bneng kala rang bad kin hap ban leh noh wut wut” ong ka Kong Wahlang haba iathuh, uwei u Kontraktor ula dep ban thep lut ia ki pipe um naduh Mawroh shaduh Mawdatbaki katba kaba sah mynta kadei sa uwei pat u kontraktor ban thep lut ia ki pipe naduh naka shnong Nongpdeng haduh Petrol Pump.
U Bah N Lyngdoh u AEE jong ka PWD Central Division, Shillong – B ula ong, ba ka tnad PWD ka long kaba la pynkhreh ban shna noh ia ka surok haka thaiñ Mawlai hynrei ia mynta ki dang ap ia ka tnad PHE ba kan pyndep noh iaka jingthep iaki pipe um shapoh jong ka surok.
Ula ong, katba ym pat dep ban thep ia ki pipe um ka PWD kan ym pat lah ban shna ia ka surok.
U Bah Lyngdoh ula ong, ka tnad PWD ka kwah ban shna noh mardor iaka surok ban pynsuk iaka leit ka wan jong u paidbah khamtam haba ka aiom mynta kala biang bha ban siang rong iaka surok hynrei katba ka PHE kam pat dep ban leh ia kaba donkam kin ym lah ban shna iaka surok.
