Shillong, Naiwieng 22 : Ka Estimate Committee ka Iingdorbar Thaw Ain ka Jylla, ha ka sngi Thohdieng, kala hiar jurip ia ki project bapher bapher ha Nongbah Shillong, kiba la pyntrei na ka Shillong Smart City Project.
Kane ka Committee kaba lamkhmat da u MLA ka Nongpoh Bah Mayralborn Syiem kum u Chairman, kala hiar jurip ia ka Iew Laitumkhrah, ka Office cum Automated Multi-Level Car Parking ha Mawkhar, ka Shillong Business-cum-Tourism Cultural Centre ha Police Bazaar bad kiwei kiwei.
Ka Committee kala shong bishar ia ka jingiaid ka jingpyntrei ia ka Iew Municipal ha Laitumkhrah kaba la pyntrei ha ka jinglut ba T.28.84 klur. Kila bishar ruh ia ka jingshna ia ki Smart Road ha kylleng ki jaka ka Sor, kiba thmu ban pynjanai ia ki lad pyniasoh bad pynduna ia ka jingkhapngiah.
Ka kynhun kala leit ruh ban jurip ia ka jingtei jong ka Office cum Automated Multi-level Car Parking ha Mawkhar, ka project kaba la pynwandur ban weng ia ki jingduna jaka pynieng kali ha Shillong. Kila jurip ruh ia ka Commercial Complex bala shna ha Polo ha ka jingmang ba T.100.33 klur, kaba la khmih lynti ban kyntiew bha ia ka ioh ka kot jong ka Sor.
Ha Police Bazaar, ka Committee kala shong bishar ia ka jingpyntrei ia ka Shillong Business-cum-Tourism nad Cultural Cenre ba T.211 klur bad pynkut pat da ka jingleit jurip ia ka Rainwater Harvesting System kiba la shna ha kylleng ki jaka ka sor Shillong ban tyngkai ia ka um.
U Chairman ula pynpaw ia ka jingihun ia ka jingiaid ki jingtei jong kine ki project. Ula kubur ia ki jingeh bala mad da ki Tnad ba pyntreikam ia kine ki project kynthup ka jingpynkynriah ia ki dukan bad kiwei kiwei, hynrei ula ban jur ba ki project kila iaid ha ka lynti kaba dei ban ai ia ka jingmyntoi kaba khraw ia ki paidbah ka Shillong.
U Chairman ula pyntip ba ia ka kaiphod ba bniah halor kane ka jingjurip, yn sa aiti ha ka por ba dei, ka ban kdew ia ki jingshem bad ki jingai jigmut. Ula pynpaw ia ka jingkyrmen ba kine ki project kin sa poi noh sha ka khep ban pyndep, ban noh synniang sha ka jingkiew shaphrang ka sor bad shakri ia ka jingdonkam ki nongshongshnong.
Kiba donlang ha kane ka jingjurip ki kynthup ia ki dkhot ka Committee kata u MLA ka North Shillong Bah Adelbert Nongrum, u MLA ka Rambrai-Jyrngam Remington Gabil Momin, u MLA ka Jowai Wailadmiki Shylla, MLA ka Ampati Miani D Shira lem bad ki Ophisar ka Assembly Secretariay, ka Tnad Urban Affairs bad ka PWD (Roads).
