Ïaroh ïa ki bor District ba lah ban pynrung Aadhaar ïa ki paidbah
Nongstoiñ, Naitung 6: U Myntri ka tnat Social Welfare ka jylla u Bah Paul Lyngdoh, hynne ka sngi u la leit jngoh ïa ka rukom treikam jong ka Tnad Social Welfare ha West Khasi Hills bad ai ka jingiaroh ia ka jingtrei borbah jong ka Tnad khamtam haba iadei bad ka jingpynrung kyrteng Aadhar ia ki Khynnah.
Ia u Myntri la synran da u Deputy Commissioner ka West Khasi Hills District, u Bah Garod L.S.N Dykes, ka Director ka tnat Social Welfare ka Kong C D. Lyngwa, u Superintendent of Police jong ka District, u B.D Marak nalor kiwei pat ki heh sorkar jong ka District.
U Myntri ula iashimbynta ruh ha ka jingïalang ba la pynlong hapoh Vanni Hall, St. Peter’s Higher Secondary School Pyndengrei, Nongstoiñ, kaba la wan ïashim bynta da ki nongtrei Anganwadi, ki khynnah na ki Shelter Homes, ki NGO bad kiwei kiwei.
Haba ai jingkren ha kane ka jingïalang, u Myntri ka tnat Social Welfare, u Bah Paul Lyngdoh, u la ai ka jingïaroh halor ka jingtrei shitom jong baroh ki nongtrei ka tnat Social Welfare, kaba kynthup naduh ki ophisar haduh ki nongtrei Anganwadi, kiba la trei shitom na ka bynta ka bha ka miat jong ka imlang ka sahlang hapoh ka District bad ka jylla hi baroh.
U la kyntu ruh ïa baroh kiba la ïa wan ha kane ka sngi ba ki dei ban don ka nongrim bad ka thong haba ki trei ïa kano kano ka kam ha ka jingim ka jong ki.
Haba kren halor ka jingpynrung kytreng Aadhaar hapoh ka distrik, u Bah Paul Lyngdoh u la ai khublei ïa ki bor pynïaid distrik na ka bynta ka jingtrei shitom ban pynsngewthuh paidbah, kum shibynta ban kyntiew shuh shuh ïa ka jingpynrung kyrteng Adhaar ha West Khasi Hills Distrik. U la kyntu ïa ki nongshong shnong ki bym pat shym la pynrung kyrteng ba kin leit pynrung kyrteng noh khnang ba kin ïoh ïa ki jingmyntoi bapher bapher na ka sorkar pdeng bad ka sorkar jylla.
Ha ka jingkren jong u Myntri, u la ban jur halor ka jingdonkam jong ka jingtreilang jong baroh ban wanrah ïa ka jingshongsuk shong shngaiñ hapoh ka imlang sahlang, khamtam ha kine ki sngi ha kaba ki kam dih bad khaïi drok hapoh ka jylla kila nang jyllei.
Haba kren halor ka jingpyndonkam ïa ka rynsan social media, u Myntri u la kyntu ïa ki paidbah ba ki dei ban pyndonkam ïa kane ka rynsan kum ka rynsan ban tei ïa ka imlang sahlang bad ban ym pyndonkam bakla ïa ka.
Kiwei kiwei pat kiba la kren ha kane ka sngi, ki kynthup ïa u Deputy Commissioner ka West Khasi Hills District, u Bah Garod L.S.N Dykes, ka Director ka tnat Social Welfare, ka Kong C. D. Lyngwa, ka District Programme Officer, ICDS Cell, West Khasi Hills, ka Kong V.C War bad ka Child Development Project Officer, ka Kong B. Rynjah kaba la ai ïa ka jingkren ai khublei.
Pule ruh: SSA Women’s League : Rung semi-phainal ka Laitkor bad ka PFR
