Shillong, Lber 31 : Ka Sorkar kala pyntip hapoh ka Iingkashari Meghalaya High Court, ba ka jingmaramot ia ka surok Jowai bypass kan dep noh hapoh u bnai Jylliew mynta u snem.
Ka Sorkar kala pyntip ia kane hakhmat ka Iingkashari kaba shong bishar ia ka mukotduma bala mudui da u Bah Kynjaimon Amse.
U Additional Advocate General ula pyntip ba u Contractor, uba la ieh noh shipor ia ka kam hadien ka jingbym iamynjur ia ka jingpan por, ula wanphai bad la ai biang ia ka work order ba un maramot ia ka bypass naduh Thadlaskein haduh Mihmyntdu, kaba la buh ban pyndep hapoh u bnai Jylliew, 2023.
Ka Iingkashari kala bthah ba kane ka kam kan wan biang sha ka jingshong bishar ha ka taiew ba nyngkong jong u bnai Jylliew ban ioh jingkhein ia ka jingiaid jong ka kam.
La pyntip na ka bynta ka National Highway Authority of India (NHAI) ba ka shi lynter ba sah jong ka surok hapdeng ka Jowai bad Ratacherra lah dep ban maramot mynta. Ka Jowai bypass ka dei kaba la khmih da ka Tnad PWD(Road) ka Jylla.
Ka Iingkashari kala buh ban bishar biang ia kane ka kam ha ka 5 tarik u Jylliew, 2023.
