Shillong Iaiong 30: Ka Sorkar Jylla kala buh ia ka thong ban pyndep noh hapoh u bnai Jylliew, ha ka ban pynbiang ia ka jaka kaba kyrpang ban shong dukan madan ha ka thain Khyndai Lad.
Ia kane la pyntip da u Myntri ka kam jngohkai ka Jylla Bah Paul Lyngdoh haba iakren bad ki lad pathai khubor ha ka jing leit iashimbynta ha ka tamasa Sohshan ba long hynne ka janmiet sngi Ba-ar ha Khyndailad.
U Bah Paul ula pyntip ba ka Sorkar kala dep ban ithuh bad ban pynrung kyrteng ia baroh ki nongdie dukan madan jong ka thain Khyndailad kiba don kumba 200 ngut, bad mynta kala sah ka long satang ban ai jaka noh ia ki ba kin buh dukan.
“Ngi la pyndep ia ka bynta ban ithuh bad ban pynrung kyrteng ia kiba shong dukan madan…kaba sah mynta ka long satang ban gin ai ia ka jaka ba kin shong dukan bad ba kin die jingdie khlem da pynwit shuh ia ka iaid ka ieng ki paidbah ha surok Khyndailad” ong u Bah Paul.
Kane ka kam ka long kaba donkam ban leh ban pynlong ia ka Khyndai lad kum ka ‘Jaka iaid kjat ki paidbah’ bad ruh kum ka ‘Music hub’-ban pdiang ia ki nongwan shangkai pyrthei bad ki nongwankai sha Shillong, kaba tip ruh kum ka Music Capital ka India.
U bah Paul ula ong “Ngi la rai ban pynbna ia ka Khyndailad kum ka jaka iaid kjat u paidbah, ha kaba kan nym don shuh ka jingiaid kali shapoh ka jaka iew. Ngi la pyniaid shakhmat iaka kam bad hapoh u bnai Jylliew, ngin sa lah ban pynkynriah noh ia ki 200 ngut ki nongshong dukan madan, kiba pyniaid ia ka die ka pet ha Khyndailad”.
Lah ban kdew hangne, kane ka jingthmu kadei ban pynlong noh ia ka Khyndailad kaba kylluid na ka bynta ki paidbah ba kin iaid ki ieng bad ba kin lait na ka jingtynruh ki kali bad ka jingdap jong ki nongdie madan ha surok.
Kum ban shu pynkynmaw, ha ki bnai kiba la dep u Bah Paul Lyngdoh ula leit jurip ia ka thaiñ Khyndailad ha kaba ula pyntip ba ka sorkar ka don ia ka jingthmu ban pynkylla noh ia kane ka thaiñ kum ka jaka kaban dei kyrpang na ka bynta kito kiba iaid kjat bad yn ym shah iaid kali shuh na Khyndailad sha Lad Umsohsun bad na Khyndailad sha Jail Road.
