Shillong, Nohprah 08 : Ka Sorkar Jylla kan sa pyntreikam ia ki action plan pyrshah ia ki karkhana coke ba treikam be-ain hapoh ka shibnai.
Ia kane la pyntip hapoh ka Iingkashari Meghalaya High Court, kaba shong bishar ia ka PIL halor kane ka kam hynnin ka sngi palei.
U Advocate General u pyntip ba ka sorkar kala dep thaw ia ka action plan kat kum ki hukum kiba don jingiadei jong ka NGT naduh ka 23 tarik Naiwieng 2022 bad la khmih lynti ban pyntreikam ia kane ka plan hapoh ka shibnai naduh ka sngi ba pynmih ia ka jingpynbna.
Ka NGT ha ka hukum ba pynmih ha ka 8 tarik Naitung 2022, kala kyntu ia ka Sorkar Jylla ban shim ia ka sienjam ha kaban thaw ia ka action plan ba iadei bad ki karkhana coke ba treikam be-ain bala pynieng shuwa ka 23 tarik Nohprah 2020, khnang ban pynkohnguh ia ki ba kin iaid kat kum ki kyndon bala pynmih ha ka jingpynbna (Notification) ba 23 tarik Nohprah 2020.
Ka hukum jong ka NGT kala kren shai ba “Ia kum kine ki action plan bad ka jingpyntreikam ia ki, dei ban leh hapoh ka sawbnai”.
Ka Iingkashari kala kren shai, ka Sorkar kala pynkhein namar ia ka action plan la pynkhreh hasien jong ka saw bnai bad ka jingpyntreikam ia ka ruh la khmih lynti ban sa pyndep, lada urlong, shuwa ka 22 tarik Nohprah 2022, khlem da pan ia ka jingpynjlan por na ka NGT.
Kala kyrmen ruh ba ka Sorkar kan shim ia ki sienjam ha kaban pyntreikam ia ki jingbthah jong ka hukum ka NGT ba 8 tarik Naitung, ha kaban khyllie ia ka Environmental Compensation kat kum ki lynti jong ka ain.
Ka Iingkashari kala bthah ruh ia ka MSPCP ba kan peitngor bha ha kaban pynthikna ba kam dei ban don ka jingpynkhein ia ki ain iada mariang, lada pynkhein, ba kan leh eiei noh mardor.
Haba kdew ia ka mukotduma suo moto ba iadei bad ka jingtih beain ia u dewiong ha Jylla bad ka jingbym lah ban pyntrei ia ki jingbthah bala pynmih da ka NGT bad ka Supreme Court, ka Iingkashari kala ong ba kala shem ba nalor ka jingdon jong u dewiong ba tih beain bala kurup, dang don bun bah u dewiong ha kylleng ki jaka.
Ka ong naba ka don ka jingdon tam jong u dewiong bala tih beain bad namar ba kam don pat ka jingai licence da ka Sorkar Jylla, la bthah ia ka Sorkar ba kan shim ia ka sienjam ha kaban lillam noh ia u dewiong bala tih beain mynshuwa bad uba dang shu tih beain hadien u 2016 ter ter.
La bthah ruh ia ka Sorkar Jylla ban pynthikna ia ka jaka ba ioh dewiong da ki karkhana coke bad ferro alloy ban treikam khnang lah ban tehlakam noh ia ka jingtih tuh ia u dewiong ha ka Jylla.
Ha kajuh ka por, ka Iingkashari kala pynpaw ba kam shym don satia kano kano ka jingkhang ia ka jingtih ia u dewiong katba ka jingtih ka iaid kat kum ki kyndon ain.
Ka Iingkashari kala buh ban shong bishar biang ia kane ka kam ha ka 27 tarik u Rymphang.
