Shillong, Lber 28 : Ka Tnad Excise ka Jylla kala dep pynkhreh ban sdang pyntreikam noh ia ka QR Code ban buddien (track) ia ka jingiaid ki mar (kyiad) bapher bapher hapoh ka 60 sngi.
“Lada long kaba lah ngin sdang pyntreikam noh hapoh u Jylliew. Hapoh 60 sngi, ngin sdang pyniaid noh” ong ka Commissioner of Excise Kong Matsiewdor War Nongbri haba iakren bad ki nongthoh khubor hadien ka jingialang bala pyniaid da u Myntri ka tnad Excise Bah Kyrmen Shylla hynne ka sngi Thohdieng.
Ka pyntip ba ki District Officer kin sa ioh ia ka jinghikai kaba bniah bha halor ka kor treikam kaba la don ban buddien ia ka kyiad IMFL naduh ka por ba dang shna ia ka tad haduh ka por ba thied da ki nongdih.
“Man ki Ophis, man ki bottling plant, man ki distillery bad bonded warehouse bad kiwei kiwei haduh ki dukan retail (winestore) kin don ia kane ka bor ban buddien ia ka mar. Kumta, man ki QR cose yn hap ban scan bad mar mar hi yn lah ban buddien shano ka mar ka poi la ka long ba la pynpoi ne em ia ka lane la ka long bala die ia ka” ong ka kong Nongbri haba bynrap “Kane kan iarap shibun bah ia ka tnad bad nga thikna ba namar ngin lah ban buddien mar mar ia ka mar, ngin sa lah ban iohi ia ka jingioh khajna jong ka Tnad tang da ka khniot ia u budam”.
Haba kylli, ka Commissioner kala ong “Namar ngi la don lypa ia ka kor kaba la dep ban mynjur bad ka kompani M/s CMP Enforce System LLP na Delhi, kaba la jop ia ka tender, kan pyntreikam ia kane bad kan sab uh ia ki briew jong ka ha ki district bapher bapher. Kane kan ym shimpor satia. Ngi la don lypa ia ki Ophisar jong ngi haduh ki constable bad kiwei kiwei ha ki bonded warehouse bapher bapher (ban pyntreikam ia ka QR Code)”.
Dang shen, u Myntri Rangbah ka Jylla Conrad K Sangma haba pynbna ia ka rai jong ka Kynhun Myntri ba mynjur ia ka jingtyrwa ban pyntreikam ia ka QR Code ha ka ban buddien ia ka kyiad hapoh ka Tnad Excise, ula pyntip ba ka jingthmu hi ka long ban pynbeit ryntih ia ki kambaroh ban pynthikna ba kan nym lait ei ka khajna.
Kat kum ka jingong jong u, ka jingpynmih khajna da ka Tnad Excise la khmih lynti ba kan kiew da 5 haduh 10%.
 ia ka jingiaid ki mar (kyiad) bapher bapher hapoh ka 60 sngi.){kind=link}