Shillong, Nailur 30 : Ka Sorkar Assam bad Meghalaya kila don mynta ha u pud ban rai khatduh ia ka jingthung mawpud bad ka jingphiah ia u pud u sam hapdeng ki ar Jylla.
Kine ki ar Jylla kila buh ia ka 31 tarik Nohprah, 2023 kum ka sngi ba khatduh ban pyndep ia kane ka jingphiah pud bad thung mawpud ha baroh ki 6 tylli ki jaka bala dep iapynbeit ha ka wat ba nyngkong.
Ka Assam bad Meghalaya kila iasoi ia ka soskular pynbeit pud (MoU) hakhmat jong u Myntri kam Pohiing ka ri Amit Shah ha New Delhi myn ha ka 29 tarik Lber, 2022 ban pynkut noha ia ka jingiakajia pud ha ki 6 tylli napdeng ki 12 tylli ki jaka ba don hapdeng ka jingiakajia.
Kine ki hynriew tylli ki jaka bala dep pynbeit ha ka wat ba nyngong ki kynthup ia ka Tarabari (4.69 sq km), Gizang (13.53 sq km), Hahim (3.51 sq km), Boklapara (1.57 sq kms), Khanapara-Pilangkata (2.29 sq kms) bad Ratacherra (11.20 sq kms). Ka jaka baroh lang bala dep iapynbeit ka long 36.79 sq kms.
“Ngi don ia ki dkhot bapher bapher jong ki Regional Committee bad ki Heh Ophisar na ki jylla bad ruh ki bor District ga kane ka jingialang bad shibun ki rai la shim mynta ka sngi” ong u Myntri Rangbah ka Meghalaya Conrad K Sangma hadien ka jingialang iakren pynbeit pud bad u Myntri Rangbah ka Assam Himanta Biswa Sarma ba long hynne ka sngi Saitjain ha Guwahati.
“Ngi sngewkmen ban tip sha ki paidbah ka Assam bad Meghalaya ba hadien ki jingiakren ba jrong bha, mynta ngi la don ha u pud ban rai khatduh eh ia ki mawpud bad ia u pud u sam ha ki hynriew tylli ki jaka ba iakajia, kiba ngi la dep iasoi ia ka MoU ha ka jingiadonlang u Myntri kam Pohiing ka Ri” ula ong.
U pyntip ba kane ka jingialang kala ai jingbit (green signal) ia ka Hahim Sector kaba la dep pynlong ia ka jingsor jamin da ka Survey of India ban ruid noh ia u pud ha ryngkat ka jingdonlang ka Sorkar Assam bad Meghalaya.
“Kumjuh ruh, ngi la ai jingbthah bad rai mynta ka sngi ba ia ki 5 tylli kiwei pat ki jaka, watla ki lai tylli kila jan dep artad, hynrei ngi la bthah ia ka Survey of India ba kan pyndep noh hapoh ka 31 tarik Nohprah 2023 ia ka jingphiah pud bad ruid ia u pud u sam ha baroh kine ki hynriew tylli ki jaka bala dep iasoi MoU” ula ong.
U Myntri Rangbah ka Assam Himanta Biswa Sarma, ula pyntip ba ka jingeh mynta ka mih tang ha kawei ka shnong kaba hap hapoh ka thain Tarabri kaba kyrteng ka Malang Salbari.
“Ngi la bthah ia ka liang ka Assam ba kan kham pynjynsur noh ha ka por ba ruid dak ia u pud khnang ba ki nongshongshnong kin ym khynwin bad ba ngin lah pynbeit da kaba jai jai” ula ong.
