Shillong Naiwieng 20: Ka Cherry Blossom Festival kaba la long 3 sngi ha Madan Kurkalang, Bhoirymbong ka dei ka tamasa kaba jop haba ianujor bad ki snem kiba la dep, ha kaba kala khring kumba 65-70% ki briew kiba nabar ka jylla Meghalaya, ong u Myntri ka kam jngohkai u Bah Paul Lyngdoh.
Ula ong ba katei ka tamasa kala long kaba jop bha ha kaba iadei bad ka jingpoi jong ki paidbah bad ka jingtem jingput ki bapher bapher, la pynpaw u Myntri ha kaba ula bynrap ba la sakhi bad iohsngew ia ki jingrwai tynrai, Hollywood, Bollywood bad kiwei kiwei.
“Kala long kaba kham pher ha kaba ka jingtem jingput kala long kaba bunjait bad kumjuh ruh ha kaba iadei bad ki briew kiba la wan” ula ong.
Kumba 65-70% na kiba wan sha ka tamasa kidei kiba nabar ka jylla Meghalaya, kaba pyni shai kdar ia ka jingjop kaba khraw haba ianujor bad ka Cherry Blossom Festival kiba la long ha ki snem kiba la dep.
“Kadei ka jingjop kaba khraw haba ianujor bad ki ar tylli ki Cherry Blossom Festival kiba la dep” ula bynrap.
Ha kaba iadei bad ka jingpynsangeh ban pynlong ia katei ka tamasa ha ka sngi kaba nyngkong, u Bah Paul ula ong ba “Kala don ka jingduhnong ha katei ka sngi hynrei la lah noh pat ban khyllie noh mardor”.
U Myntri ula pan ruh ia ka kaiphod na ki nongpyniaid jong katei ka tamasa ha kaba iadei bad ka jingduhnong jong kiba buh dukan namar ka jingpynsangeh noh iaka tamasa ha ka sngi kaba nyngkong namar ka jingpynthud ka mariang.
U Myntri Sorkar ula kren shaphang ka jingjop ha ka jingpynlong ia katei ka tamasa ha kaba ula iathuh ba na ka jingwan ka jong u Nongkit Tiensyiem ka ri Japan kala pynlong ruh ban don iaka Exchange Program bad ka Meghalaya.
Katei ka sienjam ka thmu ban wanrah ia ka jingiadei kaba iajan shaphang katei ka tamasa, khamtam haba ka ri Japan ka ju pynlong iaka jingrakhe tynrai ia ka Cherry Blossom Festival ha u bnai Jymmang.
