Shillong, Nohprah 09 : Ka Sorkar Jylla kala mynjur ia ka amendment jong ka Meghalaya Judicial Service rules 2006 bad ka Meghalaya Higher Judicial Service Rules 2015, kaba thmu ban pynjanai iaka rukom pynlong ia ki eksam, sylloabus bad ka rukom thungkam ha ki Iingkashari ka Jylla.
Haba pyntip ia kane hadien ba pyniaid ia ka jingialang ka Kynhun Myntri ha ka sngi Ba-ar, u Myntri Rangbah Conrad K Sangma ula ong “Ia kine la leh kat kum ka jingai jingmut kaba wan na ka Iingkashari bad kine ki dei eh halor ka jingpynlong ia ki eksam thungkam bad kum kine ki eksam bad kiei ki syllabus bad kumno ka jingthungkam beit beit kan long, ka percentage jong ka bad ruh ban khmih ia ki rukom long ia ki jingthungkam”.
Kawei na ki mat ba kongsan ha kane ka amendment ka dei ka jingkynthup ia ka jingtip ia ki ktien trai ri, Khasi lane Garo, kum ka jingdonkam ba kongsan.
“Ki jingai jingmut kila wan, kum ka nuksa, ka jingtip ia ka Ktien Khasi lane Garo kan long kongsan bad ngi lah pdiang ia kane ka jingai jingmut ruh” ong u Myntri Rangbah.
Ka jingpynkylla ka thmu ban pynkhlain ia ka rukom thungkam ha ki iingkashari bad pynthikna ba ki kyrtong ki don ia ka jingnang bad jingtip ban shakri ha ki Iingkashari ka Jylla.
