Nongpoh, K’lyngkot 08 : Artylli ki Shnong ka Ri-Bhoi District-ka Jorbil bad Umlangpur, kila mad ia ka jingkyrduh ka umbam umdih mynta la katto katne sngi namar ka jingshah khlong bad shah tuh haduh 27 tylli ki pipe pynpoi um sha ki shnong lyngba ka skhim Jal Jeevan Mission (JJM).
Kine ki artylli ki shnong ki dei kiba hap hapoh ka Khanapara Police Station.
Kat kum ka khubor, ka tnad PHE kala pyntrei ia ka skhim JJM ha kine ki ar tylli ki shnong ha ka jinglut kaba kot kumba T. 3 klur.
Hynrei ha kine ki khyndiat sngi, ki nongtuh ki bym lah ban tip ki dei kiei, kila khlong bad rong tuh haduh 27 tylli ki pipe um kiba pynpoi um sha kine ki arshnong-kiba mynta kila hap mad ia ka jingkyrduh um.
Ki Nongialam Shnong da ka jingud ki nongshongshnong, kila shimkhia ban leit jurip ia ki tyllong um bad kumjuh ia ki pipe um bad dei ha kane ka jingjurip, ba la lap ba ki runar kila khlong bad tuh ia ki pipe um.
Ki Nongialam jong kine ki arshnong kila ujor da ka ejahar ha Khanapara Police Station ia kane ka jingjia.
Ki Pulit kila register case ia kane kane ka ejahar bad ka jingtohkit mynta kala iaid shakhmat ban lapdien ia ki runar kiba donkti.
.){kind=link}