Shillong, Naiwieng 17: Ka Shillong Cherry Blossom Festival 2023, kam shym la ioh sdang hynne ka sngi Thohdieng namar ka jingther jong u slap ha kylleng ki jaka ka Ri-lum Khasi.
Ka tamasa iaput iatem, kaba dei kawei na ki prokram ba heh duh jong ka tamasa, ka dei ban sdang ha ka por 5 baje janmiet hynrei namar ka jingslap khlem sangeh naduh ka miet sngi Palei, kala pynkut lut ban ioh pynlong ia kano kano ka prokram jong kane ka tamasa ha kane ka sngi.
Ki nongpyniaid kila pynthikna ba ia ka sngi ba nynkong (Day 1) jong ka tamasa la pynsangeh noh namar ka jingthut jong ka suinbneng.
Kila pynbna ruh ba kito ki briew bala thied ticket jong ka sngi ba nyngkong, kin ioh ban rung ei noh la ka dei ha ka sngi ba-ar ne kaba lai jong ka tamasa. La pyntip ruh ba yn sa pynphai noh ia ka pisa jong kiba thied ia ki Pass jong ka sngi Thohdieng lyngba ki RFID card jong ki.
Ka jingwan kynsan jong u slap ha ka thain Shatei Lam Mihngi khamtam ha Ri-lum Khasi, uba la wan ha ryngkat ka lyer kaba jur ka la jia namar ka jingkhie ka eriong ha Bay of Bengal, kaba la iaid lynti sha ka thain Shatei Lam Mihngi ha ka janmiet sngi Palei.
Kat kum ka jingpyntip ka Indian Meteorological Department (IMD), la khmih lynti ba une u slap un dang iai bteng haduh ka Sngi U Blei.
Ka Shlem kala shem ba kane ka madan ba pynlong ia ka tamasa kala kynjah bha namar ka jingbym don satia ki briew kiba wan na ka daw jong u slap, nalor ka jingkhriat ka tlang.
Namar ka jingbym i don dak ba ka suin bneng kan khuid noh pynban kala nang sniew arshah da ka jingbeh ka eriong, ki nongpyniaid kila rai ban pynsangeh noh ia ka jingplie ia kane ka tamasa hynne ka sngi ha ryngkat ka jingkhuslai ioh lashai ka sngi Saitjain ruh kan mad ia kane ka juh ka jinglong jingman.
Ia kaba mynta, ym pat lah satia ban tip kumno ka jingpynkhreh kan iaid ia ki kynhun tem kiba la pynbeit ban tem hynne ka sngi Thohdieng.
