Shillong, Rymphang 17 : Ka Meghalaya kan sdang ban pyntreikam noh ia ka jingsiew tulop bala pynbeit ryntih jong ki nonghikai SSA bad Adhoc naduh ka 1 tarik Iaiong 2026 bad hap pynlut tam sa T.200 klur naka pla tyngka, pyntip u Myntri Rangbah Conrad K Sangma ha Iingdorbar Thaw Ain ha ka sngi Ba-ar.
“Ngi ju pynlut T.600 klur ia ki nonghikai SSA bad Adhoc ha ki skul lower primary bad upper primary bad da kane ka rai ban pyntreikam ia ka tulop bala pynbeit ryntih (structured pay), ngi la ai ia ka jingkiew tulop ba 3 %” ong u Conrad.
“Ban pyntreikam, ka Sorkar kan hap pynlut haduh T.800 klur shisnem. Kane ka rai kan lam sha ki kynja jingsiew bala pynbeit ryntih, ka ban ai ia ka jingsngew shngain bad ka jingkiew tulop ia ki nonghikai” ula ong.
Palat 23,007 ngut ki nonghikai la khmih lynti ba kin ioh jingmyntoi, ong u Myntri Rangbah haba pynpaw b aka dei ka rai kaba eh bha hynrei….ha ka lynti kaba dei ban weng ia ka jingsngewkhia ki nonghikai.
U Conrad ula batai ba ka rukom pyniaid ia ki skul ha Meghalaya ka dei kaba kyllain bha ha ka thain, namar ka jingdon bun jait ki skul- ki skul Sorkar, ki skul SSA, ki skul Adhoc ba pyniaid bun da ki Management Committee shimet.
“90 % ki skul adhoc bad dedicit ki dei kiba long trai da ki riew shimet ym ka Sorkar. Ka Sorkar ka ju ai grant sha ki namar ba kim lah ban pyniaid ia ki” ula ong.
Ha ka jingiaid ka por, kine ki grant kila wandur kum ka tulop, kaba lam sha ka jingkhmih lynti ba ka Jylla kan siew lut ia baroh.
“Ka dei ka jingkitkhlieh ba pura jong ka Sorkar ha ki skul Sorkar,hynrei ki skul adhoc ki dei kiba pyniaid da ki riew shimet. Watla katta, ngi sngewthuh ia ka jingeh jong ki nonghikai” ula ong haba bynrap ba kane ka jingsiew tulop thymmai kan treikam tang ia ki nonghikai SSA bad Adhoc kiba la ioh katjuh ka tulop bad ba don hapoh ka FASTOM.
“Ngim shim don hangne ban shimti ia ki skul” ong u Conrad haba jubab ia ka jingkylli bala wanrah da u Nongia lam ka Liang Pyrshah Mukul Sangma. “Ngi la wanrah ia ka jingsiew tulop bala pynbeit ryntih kat kum ka jingdawa jong ki”.
Ia ki nonghikai deficit yn sa shong bishar la ka jong, ula bynrap.
“Ki deficit ki dei sa kawei pat ka sienjam, ngi dang bishar ia ka. Ngi kwah ban iarap ia baroh hynrei man ki rai ki don ki jingktah ia ka pla tyngka. Ia mynta, ngi la pynbeit ia ka kam jong ki adhoc bad SSA”.
U Conrad ula iathuh ba ka Meghalaya, da ka jingdon palat 55000 ngut ki nonghikai bad 14000 tylli ki skul, ka mad ia ka jingeh kaba pher bha haba ianujor bad kiwei pat ki Jylla ka thain Shatei Lam Mihngi.
