Shillong, Rymphang 21 : Ka Election Commission of India (ECI) kala rai ban pynkynriah noh ia ka elekshon MLA-2023 jong ka Sohiong Constituency namar ka jingkhlad kyndih noh jong u kyrtong ka UDP Bah HDR Lyngdoh, uba dei mynshuwa u Myntri kam Pohiing ka Jylla.
Katba ki 59 tylli ki constituency kin leit sha ka jingiathep vote ha ka 27 tarik Ryphang, ia ka tarik ban thep vote jong ka Sohiong constituency yn sa pynbna kham hadien.
U Bah HDR Lyngdoh ia uba ju khot ieid u ‘Maheh’ ula shong ha ka shuki Myntri ka sorkar la bun snem bad ula mih ban iakhun biang ia kane ka elekshon ban wanphai biang kum u MLA ka Sohiong hadien 5 snem. U dei ruh u kyrtong uba khlain bha, uba la shah rem ha ka elekshon MLA 2018 tang da 622 vote ha u Bah Samlin Malngiang.
U Chief Electoral Officer (CEO) ka Jylla Bah FR Kharkongor ula pyntip “Hadien ba ngi ioh khubor halor ka jingkhlad noh u kyrtong, Bah HDR Lyngdoh na Sohiong constituency, ngi la pan jingtip mar mar na u District Election Officer (DEO) bad kumjuh ruh na u Returning Officer (RO bad u RO ula phah ia ka kaiphod ba pyntip ia kane ka jingkhlad noh u Bah HDR Lyngdoh”.
“Namar kane, u RO ula ai jingmut ban pynkynriah noh shuwa ia ka jingiathep vote jong ka Sohiong constituency bad ia kane ka jingai jingmut la phah sha ka ECI. Mynta ka ECI kan sa pynbna ia ka tarik ba thymmai ban pynlong ia ka elekshon ha kane ka constituency. Hynrei nga pyntip ba ka jingiathep vote ha ki 59 constituency kan iaid beit kumba la pynbna” ula ong.
