Nongpoh, Jylliew 29 : Ki bar jylla kiba sahwai bad trei bylla ha Erpakon kila hap ban phetshnong lut namar ka jingpyneh beit triang jong ka Dorbar Shnong ia ka rai ban beh krad ia baroh naduh ba shah pyniap u trai shnong ha ka thain.
U Rangbah Shnong ka Erpakon ula pyntip ba u trai jong ka RN Sharma Hotel, uba ai bylla ia ki nongtrei bar jylla ruh, ula dep mih na ka shnong naduh ka 13 tarik Jylliew, kaba long shitaiew hashuwa ka jingaipor jong ka Dorbar Shnong.
U Rangbah Shnong ula pyntip ia kane hapoh ka Dorbar Pyllun jong ka Shnong Erpakon kaba long hynne ka sngi Saitjain haba iathuh ruh ba ka jingiakhun jong ka Shnong ban beh ia ki bar jylla kiba sah hapoh ka Shnong Erpakin, kala kut noh.
Lah ban kdew ba ka Dorbar Shnong kala aipor ia ki bar jylla ba kin mih noh na shnong naduh ka 21 tarik Jymmang haduh ka 21 tarik u Jylliew. Kala rai ruh ban sangeh noh ia ka jingai NOC ia ki bar jylla kiba thmu ban wan sengkam hapoh u pud u sam jong ka Shnong.
Kane ka rai jong ka Dorbar Shnong kala mih hadien ka jingshah pyniap uwei u rangbah trai shnong ha u nongbylla bar jylla ka RN Sharma Hotel, kaba la jia ha ka 11 tarik u Jymmang.
Na ka liang ka Ophis u Deputy Commissioner kala khot ar-lai sien ia ka jingialang bad ka Dorbar Shnong ban iakren halor ki rai bala shim da ka Dorbar Shnong hynrei ka Shnong kala pyneh beit triang khlem da pyndem satia.
