Shillong, Nailar 04 : San ngut ki briew kiba dei na kajuh ka longiing, kila iap ha ka jinghap jong ka kali Maruti Alto ba ki iashong, shapoh ka riat Rngain ha ka miet Sngi U Blei.
Kat kum ka khubor Pulit, la iathuh ba kane ka kali bad ki briew ba iap, ki dei kiba na ka shnong Langkyrdem Laitlyting, East Khasi Hills.
La antad ba ka jingjur u lyoh khyndew hynnin ka miet lehse ka dei ka daw bah ba pynlong ia u nongniah jong kane ka kali ban tur shapoh kane ka riat kaba jrong kumba 70 phut eiei.
Ki Pulit kila hiar hynne ka step sngi Nyngkong sha katei ka jaka ban leit sei ia ki briew bad ban tan ia ka kali.
Ka khubor ka iathuh ba kine kiba iap ki dei na kajuh ka longiing ba kynthup ia 3 ngut ki shynrang bad ar ngut ki kynthei. Iwei i dei i heprit ba dang shisnem shiteng.
Kine kiba iap ki kynthup ia i Kmie Kong Alida Marbaniang ba 65 snem, arngut ki Khun Shynrang jong i, u Bah Meban Ador Marbaniang ba 28 snem bad u samla Aimiki Marbaniang bad 23 snem.
Arngut pat ki dei ka kong Risbun Kurbah ba 22 snem, kurim u Bah Meban Ador lem bad i Khun ba dang shisnem shiteng heprit Damebanshngain Kurbah.
Kine ki longiing ki dei na ka shnong Lyngkyrdem, Laitlyting.
