Shillong, Jylliew 12 : Ka liengsuin Air India Boeing 787-8 Dreamliner, kaba kit 242 ngut ki briew kynthup ki nongtrei ha liengsuin, kala hap tang khyndiat por ba ka her na Sardar Vallabhbhai Patel International Airport, Ahmedabad ban leit sha London Gatwick ha ka janmiet sngi Palei.
Kane ka liengsuin kala mih ha ka por 1:39 janmiet na ka Runway 23 hynrei kam shym la lah ban kiew sha suin bad hap noh sha madan, shabar jong ka phyllaw ka kadliengsuin, kaba lam sha ka jingpluh kaba shyrkhei bha. Ki briew ba sakhi ki pyntip ba kila iohi ia ka jingipher ka rukom her kanne ka liengsuin shuwa ba kan suh da ka khmut sha madan bad bthei.
Ka video ba ishyrkhei jong kane ka jinghap, bala saphriang kylleng ki social media, ka pyni kumno kane ka liengsuin ka ialeh ban kiew sha suin hashuwa ba kan suh sha madan bad bthei hadien ba tyngkhuh ha madan.
Ka Directorate General of Civil Aviation (DGCA) kala pynthikna ba u Pilot jong kane ka liengsuin ula aiktien ia ka jingma kaba ap hakhmat sha ka Air Traffic Control (ATC) hashuwa ba un pynher iaka liengsuin hynrei kane ka jingaiktien ka khlem poi satia bad hap noh tang da ki second.
“Palat ar dorjon ki ambulance la phah mar mar sha ka jaka ba hap kane ka liengsuin bad ia ki passenger kiba mynsaw, la pynkit noh mar mar sha ki hospital ba marjan” ong ki bor pyniaid ka kad. Ki Pulit kila ker kut noh ia kane ka jaka bad ia ki kali ruh la pyniaid noh na kiwei pat ki surok ban lah pyniaid beit ia ki lad ai jingiarap.
Ka DGCA kala pynlong ia ka jingtohkit halor kane ka jingjia bad kala phah ia ka kynhun Aircarft Accident Investigation Bureau (AAIB) sha kane ka jaka.
Kat haduh mynta ym pat lah pynthikna satia la ki don ne em ki passenger kiba iap. Ka jingiarap ban sei ia ki briew ka dang iaid shakhmat.
