Jorhat, Nohprah 02: Ka jingjia shah rahbor kaba la wanrah ka jingkhihwin hapoh ka sorbah Jorhat kaba la jia ha ka janmiet sngi Balang ba la lah kala kut noh ha ka sngi kaba bud. Katkum ka khubor la iathuh ba u Amarjit Prasad u khun jong u Radheshyam Prasad kiba shong ba sah ha ki bynta jong ka Bansbari hapoh Jorhat ula ngat ha ka shrip ki kam thok jong u hynnin ka sngi Palei hadien ka jingpyrshang ban dawa pisa haduh 50 lak tyngka na la u jong u kpa da kaba leh mynleh kum u lanot uba ngat ha ka jingshah rahbor.
Lah ban kdew ba hynnin ka janmiet, u Amarjit lem bad u paralok jong u, u Ramesh Kumar Sah kial shna hi ia ka khana shah rahbor, ia kaba ki pulit ka Jorhat kila lah ban pynkut noh tang hapoh ka 24 kynta bad pynkut noh ruh ia u dak jingkylli kaba iadei bad ki kam shong shngain jong ki riew paidbah.Hadien ba la ioh pdiang ia kane ka khubor shah rahbor, na ka liang ki pulit kila sdang ban pynlong ia ka jingtohkit kaba bniah bad pynap shrip ban ioh kem ia kiba donkti.
Hadien baroh arngut kiba shah kynnoh donkti kila ngat ha ka shrip jong ki pulit.U nongrahbor ula kyntu ia u Radheshyam ban wanlam ia ka pisa ba la dawa ha ka jaka kaba ula batai, ha kaba ki bor pulit kila wan poi da ki jain iing bad ioh kem noh ia u. Kumjuh hadien ba la pynlong ia ka jingtohkit la ioh ban kem noh ia u nong iasylla halor kane ka kam rahbor napoh kawei ka resort ba la tip kum ka Seven Sisters ha ki bynta ba marjan jong ka sorbah.
Kum ban shu pynkynmaw u Amarjit ula mih noh na la iing ha ka sngi Balang ba la lah ha ka por kumba 4 baje janmiet da kaba ong ba un leit shangkai da ka thuk thuk.Hynrei hadien ba um shym la wanphai shuh sha la iing hadien slem slem, na ka liang kiba haiing hasem bad ki para marjan kila pynpaw ka jingsuba.Hynrei wat hadien ba kila phone ia u ruh ka phone jong u kala switched off.
Hynrei, ha ka por kumba 8 baje jan miet jong katei ka sngi, u Radheshyam ula ioh pdiang ia ka phone kaba ong ba u khun jong u ula shah rahbor bad ba un siew ia ka pisa 50 lak na ka bynta ban pyllait pat ia u.
Hadien kane na ka liang kiba haiing hasem jong u Amarjit kila pynpaw ka jingkhuslai kaba jur nalor ba u nong rahbor ula maham ban pyntip sha ki bor pulit ne ki nong pathai khubor halor kane ka jingjia.
Watla katta ha kaba khatduh na ka liang kiba haiing kila leit ban ujor da ka FIR hapoh Jorhat police station kiba la rejistar case halor kane ka jingjia bad sdang ruh ban pynlong ia ka jingtohkit.Hynrei, tang hapoh kumta 24 kynta na ka liang ki pulit kila lapdien ia ki jingshisha baroh halor kane ka jingjia.
Katkum ki tyllong khubor pulit, da kaba pynshong nongrim halor ka case ba la rejistar, ki pulit kila pynlong ka jingbuddien ia ki kam bymman lyngba ka mobile network. Kham hadien u nongrahbor ula pynduna ia ka pisa ba dawa na ka 50 lak sha ka 20 lak bad hadien 10 lak haduh hynnin ka step sngi Palei.. bad kham hadien u nongrahbor ula hukum ia u Radheshyam ba un wanrah ia ka pisa T.5lak ha ki bynta jong ka Charigaon bypass na ka bynta ban pyllait noh ia u khun jong u.Na ka liang kiba haiing hasem u Amirjit kila pyntip ia kane baroh sha ki bor pulit.
Hadien kiba haiing hasem jong u Amarjit kila poi sha katei ka jaka ba la bthah da u nongrahbor na ka bynta ban aiti ia ka pisa, ha kaba ki bor pulit ruh kila shong rieh ha katei ka jaka.Hadien ba une u nong rahbor ula wan poi ban shim ia katei ka pisa ki bor pulit kila ioh ban kem suk ia u ha ryngkat ka thuk thuk.Ia une u nongrahbor la tip kyrteng kum u Phansi Ali bad u Ramesh Kumar Shah kiba dei ki nongshong shnong tynrai na Madhubani district ka Bihar.
Hadien ba ki pulit kila tohkit ia u Ramesh ha kaba iadei bad u Amarjit, une u la phla ba u don hapoh ka resort ha Dhenijaan hajan Jorhat.Hadien kane ki pulit kila wan poi ha katei ka resort ha ryngkat u Ramesh bad lapdien ia u Amarjit na kane ka jaka.Hadien na ka liang ki pulit kila shem ba baroh kine ki arngut ki donkti ha kaba iasylla na ka bynta ban shna ia kane ka drama na ka bynta ka pisa.
