Shillong, Lber 13: Ka Meghalaya Icon 2025 kaba dei ka lympung jong ka jingiakop rwai kaba heh hapoh ka jylla, ka la jied ia ka madan Malki kum ka jaka pdeng ban wanrah lang ha kajuh ka jaka ia ki nongrwai ba donsap bad kiba tbit tam na kylleng ki jaka jong ka jylla.
Ha kane ka jingpynbna mynta u snem la don khyndai tylli ki kynhun tem na ki district bapher bapher, baroh ki la ïakhun ym tang na ka bynta ka kyrdan hynrei ban pynphriang ruh ïa ka khubor kaba khlaiñ ban pynsngewthuh shaphang ka jingpang HIV/AIDS lyngba ki jingrwai jong ki.
Ka Meghalaya Icon, da ka jingthmu ban pyndonkam ïa ka jingrwai kum ka atiar ban pynkylla ïa ka imlang sahlang, ka la long ka atiar ban hikai bad pynïasoh ïa ki samla ha ka jingïakhun pyrshah ïa ka jingpang HIV/AIDS. La pynlong ha ka jingiatreilang bad ka Meghalaya AIDS Control Society (MACS), kane ka lympung ka wad ban pyndonkam ia ka jingktah jong ka jingrwai bad ka kolshor jong ki samla ban pynmih ia ka jingsngewthuh shaphang ka jingiada na ka jingpang HIV.
Katba dang mih ki snem kane ka lympung ka la nang kiew sha kawei na ki jingpynsngewthuh paidbah kaba ktah bha ïa ki samla ha ka jylla, kaba pynïasoh lang ïa ka jingpyn byrngia bad ka jinghikai bad la pynshlur ia ki kynhun tem kiba iashim bynta ha kane ka jingiakop ban pynrung ia ki khubor kiba iadei bad ki rukom treikam kiba shngain, ka jingtest HIV, ka jinglah ban ioh jingsumar.
Ka jingiakhun jong ki kynhun tem, Ha kane ka jingïakob ka la sakhi ïa ka jingpynkhih win katba ki kynhun tem ki dang pyni ïa ki jingrwai da kaba pynïasoh ïa ka jingstad bad ki khubor ba khlaiñ ha ka imlang sahlang. Na ki jingrwai rock bad metal haduh ka fusion bad ki jingrwai tynrai, kane ka lympung ka la pyni ïa ka sap rwai bapher bapher ia kaba ka jylla Meghalaya kala bna nam.
Hadien ka jingïakhun kaba la pynshongshit bha ia ki paidbah, ïa ka nam lahduh jong ka Meghalaya Icon 2025 la ïoh da ka Magnificent Obsession, ha kaba ka jingrwai kaba itynnad bad ki kyntien kiba ïadei bad ka imlang sahlang ki la pynhun ïa ki nongpeitkai bad ki nongbishar. Ka jingrwai jong ki ka rah ia ka khubor jong ka jingkyrmen, ka jinglah ban shah, bad ka jingsngewthuh, kaba la pynlong ia ki ki nongjop ia ka khusnam bah kaba ₹1,50,000.
Ia ka kyrdan ba ar la ioh da ka Remnants, ka kynhun tem kaba la pynsngewtynnad da ka jingdon jong ki ha madan kaba la pynlong ia ki ban ioh ia ka khusnam pisa kaba ₹1,00,000. Ka Ria Sharak ka la mih kum ka nongjop kaba ar, da kaba rah sha la iing ia ka pisa kaba ₹80,000.
Nalor kata, ki kynhun tem Best Five ki la ïoh ₹10,000 kawei kum ka dak jong ka jingithuh ïa ki jingnoh synñiang ba radbah jong ki.
Ki jingithuh ba kyrpang ia ka jingtbit jong uwei pa uwei, la ai khusnam ruh ha kine ki bynta harum: Best Vocalist, Best Bassist, Best Guitarist, Best Drummer, Best Theme Song, Kine ki khusnam ki thmu ban pynshlur ia ki nongtem ban bteng ban pyndonkam ia ka sap jong ki kum ka lad ban iasaid bad ban pynkylla ia ka imlang sahlang.
Ha kane ka lympung la wan ban ia don lang da u Sampath Kumar, Principal Secretary ka tnad ka Koit ka Khiah ka Sorkar Meghalaya, kum u Kongsan bad haba kren u la ai ka jingïaroh ïa ka jingpyrshang jong ka Meghalaya AIDS Control Society bad ki nongtem kiba ïashim bynta ban pynïar ïa ka jingsngewthuh lyngba ka jingrwai.
