Shillong, Naitung 26: Ka Liang Pyrshah Voice of the People Party (VPP) kala buh jingkylli ia ka jingleh hok bad bym shah liang jong ka Meghalaya Public Service Commission (MPSC) ha ka jingkhmih biang ia ki OMR answer sheet.
Ha ka kyrwoh, u Vice President ka VPP Dr Kara H Chen ula ong ba ka party ka pynpaw ia ka jingsngewhia kaba jur bad ka jingbym hun ia ka jingpynbna ba dang shen jong ka Meghalaya Public Service Commission (MPSC) ba iadei bad ka MCS Preliminary Examination 2022-2023 ba long ha ka 4 tarik Naiwieng, 2023.
Ka jingpynbna bala pynmih ha ka 23 tarik Naitung, 2024, kala pynpass biang sa ia 62 ngut ki nongiakhun eksam na ka result bala dep ban pynbna.
Kane ka jingkhmih biang ia ka OMR answer sheet ka dei kaba la leh hadien ka jingujor jong u nongiakhun eksam, ba iadei bad ki jingkylli bala ai ha kane ka eksam, ula ong.
U Dr Chen ula ong ba ka lynti kaba ka MPSC kala rai ban khmih biang ia ka answer sheet hadien ka jingshah ujor kala pyn sngewkhia jur bha halor ka jingleh hok bad ka jingleh khuid. Kam long satia kaba shai ba ha ka rule ne kyndon aiu bala khmih biang ia kane ka answer sheet.
Ula ong ruh ba ka por kata hadien hynniew bnai bala dep pynbna ia ka result bad ka rukom pynmih biang ia ka result kaba bynrap, kala pynsheptieng ia ka jingdon ka jingthung bahaiing ne paralok. U ong ba ki nongiakhun eksam bala pyn pass hadien ka jingujor ka lah ruh ban long namar ka jingdon ki nongpynbor lane jingjied kyrpang, kaba pynmih ia ka jingsngewkhia ba hato kane ka jingkhmih biang ia ki answer sheet ka dei kaba la lah tang ban pynpass ia kito kiba la pheil.
Haba dawa ba dei ban shong bishar mardor ia kane ka jingkhmih biang ia ki answer sheet, u Dr Chen ula ong “Ka VPP ka dawa ba dei ban shong bishar mardor bad ba bniah bha ia kane ka rukom pynlong ka MPSC ia ka jingkhmih biang ia ki answer sheet. Ngi kyntu ia ka Sorkar ba kan ai jingshai halor ki rule bad ki kyndon ba iadei bad kine ki jingkhmih biang ia ka result bad ba pynthikna ba ki eksam ban sa long hadien hadien kin dei kiba iaid ha ka lynti kaba lehhok bad ba shai”.
 kala buh jingkylli ia ka jingleh hok bad bym shah liang jong ka Meghalaya Public Service Commission (MPSC) ha ka jingkhmih biang ia ki OMR answer sheet.){kind=link}