Buh mawnongrim ban tei ia ka Madan Futsal ha Lower Mawprem
Shillong, Lber 08 : Ka Sorkar Jylla kala pynkhreh ban shna haduh 20 tylli ki madan ialehkai futbal ha kylleng ki jaka jong ka Jylla haba mang ruh ia ka song pisa ba kot T.700 klur ban tei ia ki madan ialehkai bapher bapher.
Ia kane la pyntip da u Myntri Rangbah ka Jylla Conrad K Sangma haba buh mawnongrim ban shna ia ka madan ialehkai futsal ha madan shnong ka Lower Mawprem hynne ka sngi Thohdieng.
Ha kane ka jingialang la iadonlang u Myntri ka kam ialehkai Bah Shakliar Warjri bad u Myntri kam jngohkai Bah Paul Lyngdoh.
Haba ai jingkren, u Conrad K Sangma, ula ong ba ka sorkar ka kut jingmut shisha na ka bynta ki samla bad ki kam kiba iadei bad ki samla, bad ka tnad ialehkai kadei ka tnad kaba kongsan tam ha kaba iadei bad kane ka bynta.
“Ha kine ki snem kiba la leit, ngi la bhah kumba T.700 Klur na ka bynta ki jingtei bapher ha ka kam ialehkai bad palat 300 tylli ki jingtei la iai bteng ban thaw ha kaba 122 tylli ki projek la dep ban tei pyndep ha kine ki 3 snem kiba la dep” ula ong.
Ula pyntip ruh ba sa kumba 20 tylli ki madan Futsal y nsa tei ha kylleng ki bynta jong ka jylla.
U Myntri Rangbah ula ong ba ka sorkar ka don ia ka jingthrang ban buh ia ki rynsan na ka bynta ki samla ka jylla lyngba ki prokram ki bapher kum ka Skills Meghalaya, YESS Meghalaya, PRIME, CM Elevate bad kiwei kiwei.
Ula pyntip ruh, ba lyngba ka jingtei ia ka Mawkhanu Sports Complex ia kaba la mang T. 350 Klur bad kane kan kyntiew bha ia ki kam ialehkai.
“Hadien ba la dep ban tei pyndep ia ka Mawkhanu Sports Complex, ngin sa lah ban pynlong ia ki jingiakob bapher kiba ha ka kyrdan National bad International hapoh ka jylla Meghalaya,” ula ong.
Ula pynpaw ruh ba lyngba ka STAR Program Talent Scouting kan iai bteng bad yn pynlong ia ki prokram ki bapher bapher na ka bynta ban kyntiew ia ki nongialehkai na ka bynta ka 6th Meghalaya Games kaban long ha Jowai bad na ka bynta ka National Games kaban sa long ha ki snem kiban sa wan.
