Nongpoh, Rymphang 21 : Ka Jirang Constituency kala sakhi mynta ia kiba bun ki jingkylla ha ka roi ka par tang ha kine ki san snem ba synshar da ka Sorkar MDA ba ialam da NPP bad ka constituency haduh mynta kala ioh pdiang haduh T. 500 klur kam ka song pisa ban pyntrei ia ki kam pynroi bapher bapher.
Ia kane ka pynbna da u MLA Bah Sosthenes Sohtun uba iakhun ban wanphai biang kum u MLA ha kane ka elekshon ban long la 27 tarik napoh kane kajuh ka constituency, ha ka rynsan ialap elekshon ba long hynne ka sngi ba-ar ha Byrnihat.
Kat kum ka jingong jong u, ka Jirang constituency ka dei kaba sahdien bha na baroh ki constituency ka Jylla bad ka dei ruh ka constituency kaba la shah iehbein bad shah ieh khunswet ha ki Nongmihkhmat bala leit noh ki bym don ka mynsiem ban peit ia ka bha ka miat u paidbah.
“Ka NPP ka dei ka party kaba peit ia ka bha ka miat u paidbah bad ia kane phi lah ban sakhi ha kine ki san snem ba ka Synshar ia ka Jylla halor ka jingwan ki kam pynroi hapoh ka thain” ong u Bah Sosthenes.
U Bah Sosthenes ula pyntip ba kum u MLA ha ka jingiatreilang bad ka Sorkar, ula lah ban wanrah ia shibun ki kam pynroi hapoh ka thain naduh ki surok, ki jaka pule kum ka Model Degree College, ka jingkyntiew kyrdan ia ka Patharkhmah sha ka Civil Sub Division, kyntiew kyrdan ia ki jaka sumar bad kiwei kiwei.
“Ka constituency ka dang donkam shibun ki kam pynroi…kine kiba la wan mynta kim pat biang satia bad khlem pep lada ki paidbah ki ai biang ia ka jingshaniah ha u ban mihkhmat bad ia ka NPP, ki kam pynroi kiba bun kin dang iai wan” ula ong.
U Bah Sosthenes ula ther tyngeh ia kiwei ki seng sain pyrthei kiba kynnoh laiphewjait ia ka NPP bad ia u kum u kyrtong ha kane ka elekshon.
Ula ong ba naduh ba u mih iakhun ia ka elekshon ba nyngkong ha u snem 2013, kiba bun ki party kila wanrah ia ka jing sngew iapher jaidbynriew hapdeng ki Khasi, Nepali, Assamese, Boro bad kiwei kiwei kiba sah hapoh ka Jirang constituency hynrei dei hadien ka jingjop jong u ha u 2018, ula lah ban weng ia kine ki jingpynsngewthuh bakla jong kiwei ki seng sain pyrthei.
Ha kane ka sngi, ka party NPP Jirang constituency, ka la pdiang burom ruh ia ki nongialam sainpyrthei kiba la mih noh na ka party BJP, Congress bad UDP, kiba la rai pat ban ai ka jingkyrshan bad ka jingiatreilang ban pynjop ia u kyrtong ka NPP ha kane ka ileksion kaban sa wan.
Da ki hajar ngut ki paidbah kila iatuid sha kane ka jingialang ban sngap ia ka jingkren jong ka MP ka NPP Agatha Sangma, hynrei namar ka jingbym khuid ka suin bneng, ka helicopter kaba shong da kane ka MP kam shem la iohlad satia ban hiar madan bad kane ka MP ka la hap ban leit phai noh pat sha kiwei pat ki jingialang kiba la pynlong da ka party NPP.
