Shillong, Naiwieng 03: Ka Ministry of Home Affairs (MHA), kala ai ka jingmynjur ban pynrung lang noh ia ka ktien Garo ha ka thup jong ki ktien kiban sa ioh ia ka jingithuh hapoh ka Khyrnit ba phra jong ka Riti Synshar ka Ri.
Ia kane ka pyntip da u Myntri Rangbah ka Jylla Conrad K Sangma lyngba ki Social Media jong u hynne ka janmiet.
Haba thoh ha X, u Myntri Rangbah ula ong “Haien ba ktien Garo kam shym la shah kynthup napdeng ki 38 tylli ki ktien ki ban sa shong bishar ban pynrung ha ka Khyrnit ba phra ia kaba la pynbna da ka Ministry of Home Affairs (MHA) ka Sorkar India, ka MP Agatha K Sangma bad Lamphang ka Jylla Thomas A Sangma, kala ialam ia ka kynhun ban kyrpad ia ka MHA. Halor ka jingkyrpad jong ki, ka MHA kala mynjur mynta ban kynthup lang ia ka ktien Garp ha ka thup ki ktien ba dawa ban ithuh noh”.
Ka kynhun ki Heh ka National People’s Party (NPP) kila hiar sha Nongbah Delhi bad iakynduh ia ki Heh ka Ministry of Home Affairs (MHA) ka Sorkar Pdeng.Kane ka Kynhun ka dei kaba la ialam da ka MP ka Lok Sabha na Tura Agatha Sangma ha ryngkat u Lamphang ka Iingdorbar Thaw Ain ka Jylla Thomas A Sangma, u Myntri Sorkar Marcuise N Marak bad kiwei kiwei.
Kine ki Heh ka NPP kila iakynduh ia u Secretary ka MHA ha New Delhi hynne ka step sngi Thohdieng bad ka jingiakren kala iaid halor ka jingpynrung lang noh ia ka ktien Garo ha ka thup kumba rung ka Ktien Khasi bad 37 tylli kiwei pat ki Ktien, ki ban sa ioh jingithuh noh hapoh ka Khyrnit ba phra jong ka Riti Synshar.
Ka jingthmu jong kane ka jingleit iakynduh ka long eh ha kaban pynthikna ba ka ktien Garo kan ioh lang noh ia ka jingithuh.
Ki ktien kiba la don ha ka thup bad kiban dang ioh ia ka jingmynjur ki dei ka Ktien Khasi, Angika, Banjara, Bazika, Bhojpuri, Bhoti, Bhotia, Bundelkhandi, Chhattisgarhi, Dhatki, English, Garhwali (Pahari), Gondi, Gujjar lane Gujjari, Ho, Kaachachhi, Kamtapuri, Karbi, Kodava (Coorg), Kok Barak, Kumaoni (Pahari) and Kurak.
Kiwei pat ki ktien ki dei ka Lepcha, Limbu, Mizo (Lushai), Magahi, Mundari, Nagpuri, Nicobarese, Pahari (Himachali), Pali, Rajasthani, Sambalpuri lane Kosali, Shaurseni (Prakrit), Siraiki, Tenyidi bad Tulu.
Ia mynta, ki don 22 tylli ki ktien kiba la rung ha ka khyrnit ba phra ka riti synshar ka ri bad kine ki dei ka Assamese, Bengali, Bodo, Dogri, Gujarati, Hindi, Kannada, Kashmiri, Konkani, Maithili, Malayalam, Manipuri, Marathi, Nepali, Oriya, Punjabi, Sanskrit, Santhali, Sindhi, Tamil, Telugu, bad Urdu.
, kala ai ka jingmynjur ban pynrung lang noh ia ka ktien Garo ha ka thup jong ki ktien kiban sa ioh ia ka jingithuh hapoh ka Khyrnit ba phra jong ka Riti Synshar ka Ri.){kind=link}