Imphal, Jylliew 05: Tang shisngi hadien ka jingkyntu jong u Myntri kam Pohiing Amit Shah ia ki paidbah ka Manipur ba kin weng noh ia ka pakhang surok ha surok Imphal-Dimapur bad National Highway-2, ki kynhun ba iakhih ha kane ka jylla ba mad ia ka thma pher jaidbynriew, kila pynsangeh noh shipor ia ka pakhang surok bala buh ban pynlong shibnai lynter.
Kane ka surok Highway ka dei kaba la tip kum ka Trans-Asian Highway No-1, kaba la plie paid hynne ka sngi Nyngkong hadien shibnai ka jingpakhang naduh ba khie ka thma pher jaidbynriew ha Manipur kata naduh ka 3 tarik Jymmang.
Kat kum ka jingiathuhu Nongaiktien ka Committee on Tribals Unity (COTU) Sadar Hills, Kangpokpi District, Rev K Sitlhou la ong ba ki paidbah ka Kangpokpo kila rai ban plie noh tang shipor ia ka National Highway-2 haduh 7 sngi.
Ula pyntip ba kane ka surok kan plie naduh ka 5 tarik Jylliew kum ka jingsngew burom ia ka jingwan iuhkjat u Myntri kam Pohiing Amit Shah ha Kangpokpi District myn ha ka 31 tarik Jymmang, kaba la bud da ka jingkyntu.
Ula pyntip ruh ba baroh ki kali ba kit ia ki mar ba donkam kum ki dawai bad ki marbam yn shah ban iaid ha kane ka surok bah khlem ka jingdonkam ban pahara da ki bor shipai.
La ong ruh ba ka jingiaid jong ki kali ba kit ia kine ki mar ba donkam kan long naduh ka por 10 baje mynstep haduh 2 baje janmiet.
U Sitlhou ula bynrap ba ia kane la kam kum ka jingkyrshan ia ka “Mission Jingsuk” jong ka Sorkar India ban pynbeit ia ka jingeh jong ki paid Kuki.
