Nongpoh, Nailar 17: Katba nang mih ki sngi ka jingpang saw khmat (Eye Flu) ba ju iakhot hangne ha Ri-lum Khasi da ka jingpang Bangla, ka la nang jur bad ktah ia palat spah ngut ki riew paidbah hapoh ka jylla Meghalaya khamtam ha Ri Bhoi District ha kaba kane ka jingpang ka la sar bad ktah naduh ki khyllung khynnah haduh ki rangbah briew.
Katkum ka jinglum jingtip, la ong, ba kane ka jingpang khmat kaba la nang kynrei bha ha kine ki sngi, ka la pur na kawei ka sngi sha kawei pat, kaba la pynlong ia ki riew paidbah ban husiar dalade kumno ban iada na ka jingsaphriang jong kane ka jingpang.
Ha ka jingngeit jong ki riew rim, la ju iathuh khana ba kane ka jingpang saw khmat, ka dei kata ka jingpang Bangladesh bad ki ju sin kum ka jingpang Bangla namar ka jingkhie saw ki khmat baroh arliang bad ha kata ka jingngeit ki ju kdew ruh ia ki lad jingiada ba lada ki paidbah ki teh ia u sai iong ne sai byrni ha ki bynta jong ka kti ne kjat kane ka jingpang kam ju saphriang ne ngat klumar sha kiwei pat.
Na ka liang u Dr. E. Kharnari, District Medical & Health Officer (DMHO) ka Ri Bhoi District haba ia kren bad u Nongthoh Khubor, u la kubur ba kane ka jingpang saw khmat (Eye Flu) ka la ktah ia ki riew paidbah kata naduh ki khyllung khynnah bad wat ia ki riew rangbah bad ka la nang saphriang na kawei ka sngi sha kawei pat ha kaba na ka liang ka tnad jong ka Koit ka Khiah ruh ka la shimkhia ban pynbiang ia ki lad jingsumar kiba paka ban sumar ia kito kiba shah ktah ha kane ka jingpang.
U la iathuh ruh, ba na ka liang ka tnad jong ka Koit ka Khiah ka jylla Meghalaya ka la pynmih ia ki jingbthah sha ki riew paidbah ban iada ialade na kane ka jingpang khmat kiba kynthup naduh ka jingleh khuid ia ki kti, ka jingpyndonkam ia ki jain jhieh ban niad ia ki khmat bad ban bret ha ki jaka kiba biang, ban pyndonkam da ki jingdeng itkhmat, ka jingleh khuid shimet khamtam eh ka jingdonkam ban leit pyni sha ki doctor khmat bad ban bud ia ki jingsumar kiba paka.
Kane ka jingbthah ka la batai ruh, ba ki paidbah kiba ioh ia kane ka jingpang khmat, kim dei ban pyndei ne synreit um shapoh ka khmat, ban nym iasam ia ki jingniad kti ne khmat bad wat ia u syngkhin khlieh, ban nym ktah ia ki khmat na ka por sha ka por, ban nym pyndonkam ia ki jingdeng hapoh ki pyllew khmat (Eye contact lenses) bad ban nym pyrshah ban sumar hi dalade ia kane ka jingpang.
Pule lang ia kane: Ainam ka ICAR ia ka Guest House sha u Tirot Sing ha ka jingrakhe I-Day
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
