‘Ngin pynleit jingmut tang ia ka elekshon MDC’: Passah
Shillong, Kyllalyngkot 07: Ka Khun Hynniewtrep National Awakening Movement (KHNAM) kan ym sei kyrtong ban iakhun iaka elekshon MP Lok Sabha hynrei kan shu ai jingkyrshan ia kano kano ka seng saiñ pyrthei ka bym don jingiadei bad ka seng BJP.
Haba iakren bad u Working President ka KHNAM Bah Thomas Passah ula ong, ba ka KHNAM kan ym pynieng kyrtong ha ka elekshon MP Lok Sabha 2024 hynrei kan shu ai jingkyrshan noh ia kano kano ka seng ka bym don jingiadei bad ka seng BJP.
“Ka seng kala dep shim ia ka rai ban ym pynieng kyrtong ha ka elekshon MP Lok Sabha hynrei shen kin sa shong ia ka jingialang ban shim ia ka rai iano ban ai jingkyrshan bad ia mynta hi ka seng kan pynleit jingmut beit tang ha ka elekshon MDC” ong u Bah Thomas Passah.
Ula ong, haduh mynta ka seng kala iaid shaphrang ha kaban pynkhreh ia ka elekshon MDC bad kila don palat 20 ngut tam kiba la pan tiket ban iakhun na ka KHNAM ha ka elekshon ka KHADC.
“Kila don kumba 20 ngut kiba la ai da ka jingthoh bad kiba la pynpaw da ka ktien ba ki kwah ban iakhun ia ka elekshon MDC na kylleng ki Constituency” ong u Bah Passah.
Ula ong ba ka KHNAM kala dep thaw iaka State Election Committee ba kan bishar ia kitei kyrteng jong kiba pan tiket bad hadien kane ka Central Executive Committee kan sa pynbna iaka kyrteng jong ki kyrtong ban iakhun iaka elekshon MDC na ka seng.
Lah ban ong, ha ka elekshon MLA 2023 ka KHNAM kam shym la pynieng kyrtong bad mynta ka kynti ruh kala rai ban ym pynieng kyrtong haka Elekshon MP Lok Sabha.
