Shillong, Nailur 12: U MLA ka Nongpoh bah Marylborn Syiem hynne ka sngi Ba-ar, ula pyntip ba hadien ka Dorbar Synrai, kan sa don ka jingleit jurip lang iaki jaka iakajia hapdeng ka Regional Committee jong Meghalaya bad Assam.
Haba kren sha ki lad pathai khubor u bah Marylborn ula ong ha haka jingshisha, ka jingialang hapdeng ka Regional Committee jong Meghalaya bad Assam ka dei ban long haka 25 tarik Nailar hynrei namar ki kam bym lah kiar jong u Chairman ka Regional Committee Ri-bhoi District, la hap ban pynkynriah noh iaka jingialang.
U bah Marylborn ula iathuh ba ki artylli ki Regional Committee kila pynbeit ruh ban leit jurip iaki jaka iakajia haka 26 tarik Nailar hadien ka jingialang hynrei namar ba la pynjlan iaka tarik ban shong jingialang, iaka jingleit jurip iaki jaka iakajia ruh la hap ban pynkynriah.
U iathuh ba dei namar kane, ki Regional Committee na baroh arliang kila pynbeit ban pyndep noh ia kine ki kam hadien ka Dorbar Synrai ka Meghalaya.
Haba iadei bad ka jingshah pynthut ki kam pynroi haki thain khappud, u MLA ka Nongpoh ula ong ba donkam ban iakren sngewthuh hapdeng ki sorkar jylla bad ki bor district ban pynthikna ba ki kam pyntreikam iaki kam pynroi kim dei ban shah pynthut namar kane kan pynduhnong iaki nong shong shnong jong baroh baroh artylli ki jylla.
“Lada don kino kino ki kam pynroi ha Ri-bhoi, ka ophis Deputy Commissioner (DC) ka hap ban pyntip sha ka ophis Deputy Commissioner jong ka Kamrup Metro Assam bad kane kan long mar kylliang hynrei watla katta kan don beit ka jyrwit jyrwat hangne hangtai hynrei ki artylli ki sorkar jylla bad ki bor district ki hap ban shim khia halor kane ka bynta khnang ban nym shah ktah ki nong shong shnong ha ki thain khappud” ula ong.
