Tura, Iaiong 28 : Ka jingkyndit bad ka jingkhuslai kala wan mynta ha Ri-lum Garo hadien ka jingiap biang jong uwei u Nongpang na ka khlam Covid-19 ha ka sien ba nyngkong eh ha Tura, hadien arsnem mynta.
Une u Nongpang Covid ula iap ha ka 27 tarik Iaiong hapdeng ka jingsumar ha Tura Holy Cross Hospital. Une u Nongpang u dei uba la 41 snem ka rta uba dei n aka shnong New Bhaitbari, kaba hap haka thain Rajabala, West Garo Hills.
La wanrah ia u sha Tura mynta la 5 sngi hadien ka jingud pang na ka jingshitom ban ring mynsiem bad jingshitmet.
Ka jingpang kala nang ban jur ia u bad khatduh une u briew ula khlad noh hynnin ka sngi Palei, bad long uba nyngkong eh ban iap na kane ka jingpang hadien arsnem b aka wan lynshop hapoh ka Jylla.
Ki doktor kim lah satia ban pynthikna la une u nongpang ula dep ai injek iada khlam ne em namar ka jingbym don ia ki kot ki sla watla ki bahaiing hasem kila kam ba ula pyndep ban injek.
Kane ka jingiap ba kynsan kala pynkhuslai biang namar ki paidbah ha Ri-lum Garo kila mih leit trei leit ktah khlem ki lad jingiada ialade.
Ka jingpyndonkam ia ki mask durkhmat kila jah hapoh ka thain bad ki briew kim phikir shuh wat tang ban sait bha ia ki kti ruh nalor ka jingpynjngai ialade na kiwei pat.
