Nongpoh, Jylliew 09 : Ka Western Ri-Bhoi hadien 50 snem tam ba ioh Jylla lajong, kala ioh ia ka Police Station ba pura bad ba nyngkong eh, kaba wan da ka jingkyntiew kyrdan ia ka Patharkhmah Police Outpost sha ka Police Station ba pura.
Kane ka jingioh Police Station ka Patharkhmah kala urlong hynne ka sngi Thohdieng da ka jingleit plie paidbah u MLA ka thain Bah Sosthenes Sohtun ha ka jingiadon ryngkat u Superintendent of Police ka Ri-Bhoi District Giri Prasad ia kane ka Police Station ba pura.
Kane ka jingkyntiew kyrdan ia ka Patharkhmah OP sha ka Police Station ka dei kaba la mynjur da ka Sorkar da ka jingthmu ban pynsuk ia ki paidbah haba ki donkam ia ka jingshakri jong ki Pulit bad ban pynjan ruh ia ka jingiadei hapdeng ki Pulit bad ki paidbah.
Kiba la iadonlang ha kane ka sngi ki kynthup ia u Additional Deputy Commissioner ka District Bah MB Tongper uba dei ruh u SDO ka Patharkhmah Civil Sub Division, u Addl SP Bah B Diengngan, u DSP Headquarter Bah S Paslein, u Syiem ka Hima Jirang Bah H Wahlang, ki Ophisar Pulit bad kiwei kiwei.
Kumban shu kdew hangne, ia ka Patharkhmah Police Outpost la pynkha naduh u snem 1973 hynrei na ka jingnang roi jong ki Shnong bad ki briew, ki jingdawa kila mih la bun bun snem na ki paidbah ba dei ban kyntiew kyrdan noh ia kane ka thanad sha ka Police Station khnang ba kan ai jingiada ia u paidbah, kan ialeh pyrshah ia ki kam sniew kam smeh ha ka thain.
Haba kren ha ka jingialang, u MLA ka Jirang ula pynpaw ia ka jingkmen ba ka Sorkar kala lah ban pynurlong ia ka jingangnud bala slem jong u paidbah. Ula air uh ka jingiaroh ia ka Sorkar ba ialam u Conrad K Sangma, kaba sngap bad shah skhor ia ka jingkyrpad jong u kum u MLA ban kyntiew kyrdan noh ia kane ka Outpost sha ka Police Station.
Ha kane ka sngi, u MLA ula pynbna ruh ba ka Sorkar kan sa kyntiew kyrdan noh ruh sa ia ka Rani Anti Dacoity (AD) Camp sha ka Rani Police Outpost ba kan lah ban ai jingshakri ba kham bha ia u paidbah ka thain.
