Shillong, Nohprah 13 : Ka Jylla Meghalaya kala ioh mynta iala ka jong ka University ne State University ba nyngkong eh hadien 50 snem ka jingioh iala ka jong ka Jylla ba pura.
Kane ka State University ka dei ka Captain Williamson Sangma State University kaba la pynkylla na ka Captain Williamson Sangma Technical University.
Since Meghalaya does not have a state university and all colleges are affiliated to NEHU, Cabinet felt necessary to change the Technical University to a State University and allow colleges within the State to have the opportunity to be affiliated to the new State University.
— Conrad Sangma (@SangmaConrad) December 13, 2022
Kane ka dei ka rai bala shim da ka Sorkar Meghalaya Democratic Alliance (MDA) ha ka jingialang jong ka Kynhun Myntri ba long hynne ka sngi ba-ar.
Haba iakren bad ki nongthoh khubor, u Myntri Rangbah ka Jylla ula pynbna ba ka Captain Williamson Sangma Technical University kan kylla noh sha ka Captain Williamson Sangma State University.
U pyntip ba ka Kynhun Myntri kala ai jingmynjur ia ki jingpynkylla ha ka Ain jong kane ka University bad la mynjur ia ka Ordinance ba kan treikam noh.
“Ia kane ngi la leh namar ka Jylla kam don satia iala ka jong ka State University bad namar kane ka daw, ngi shem ba baroh ki College ki hap ban pyniasoh ialade sha ka NEHU. Naba ngi la don ia ka Captain Williamson Sangma Technical University, kumta ka Kynhun Myntri ka sngewdei ban pyniar ia ka jingtreikam jong kane ka Technical University sha ka State University” ong u Conrad.
Kat kum ka jingong jong u, ki College kiba don ha Jylla mynta kila lah ban jied ha kaban pyniasoh sha kane ka State University ha ka jaka jong ka NEHU.
“Ka jingthmu ba hakhmat eh ka long ban pyniar ia kane ka State University ym tang jong ka lain pule Technical hynrei kan kynthup ruh ia kiwei kiwei ki tnad pule” ula ong.
“Shisien ba la treikam kane, ki kyndon bala buh da ka Sorkar Pdeng ba kynthup ia ka CUET Exam kaba pynlong kongsan ha ki University ka Sorkar Pdeng, kan nym treikam shuh shisien ba ki College kila pyniasoh sha ka Captain Williamson Sangma State University” ula bynrap.
Ka Kynhun Myntri kala rai ruh ban sdang noh ia ka lain pule BA bad B.Com da kaba pynkha haduh 39 tylli ki Post nonghikai bad ki Nongtrei ha ka College of Teacher’s Education, Tura.
“Ia kane la leh kat kum ka Education Police ba thymmai, kaba pynlong kongsan ia ki College ba kin don ia ki lain pule bapher bapher. Namar kane, khnang ba ka College of Teacher’s Education, Tura, kan lah ban iaid shakhmat kat kum kane ka Education Policy ba thymmai, kine ki lain pule BA bad B.Com kin sa sdang noh” pyntip u Myntri Rangbah.
