95 ngut ki Khynnah bad 50 sobjek hap shim man ka sngi
Nongstoin, Nohprah 13: Ka long kaei kaei ka bym sngew lah ngeit ba kat ka skul Sorkar, kaba khmih bad pyniaid da ka Tnad Education, kan poi ha u khep ba ia ka skul la hap pyniaid tang da kawei ka Nonghikai bad hap ban shakri ia ki 100 duna ki Khynnah bad hap shim klas ruh haduh 50 sobjek marwei khlem ki nongiarap.
Kane kala jia ia kawei ka Nonghikai Kong Risbiolin Lyngdoh kaba hikai ha ka skul Kyrdum Govt LP School, kaba don ha ka thain Ri Muliang, West Khasi Hills District.
Kaba sngew thamula ka long ba ka Tnad Education kam shym la iohi ia kane ka jingsohsat kane ka Nonghikai kaba la hap shim ia ka jingkitkhlieh na ka bynta ki bha ka miat ki Khynnah mynta la kumba 2 snem eiei.
Kane ka Nonghikai kala hap shim klas ia ki khynnah skul naduh ka klas A haduh klas V, kiba don haduh 95 ngut ki Khynnah.
Ka Kong Risbiolin Lyngdoh ka bat hi halade ia ka kam Headmistress jong kane ka skul Sorkar ha Kyrdum bad ha kajuh ka pork a bat ruh kum ka Head Teacher, Peon, Clerk bad Chowkidar bad hap leh hi ruh ia baroh ki kam skul ne kam Ophis.
Ka skul Kyrdum Govt LP School, West Khasi Hills, ka dei kaba la seng naduh u snem 1958 bad kane ka skul ka dei kaba ai jinghikai ia ki nongshongshnong ka thain la 65 snem eiei ba kin nang ha kaban thoh ban tar bad ban pule dak.
Ka ‘Shlem’ kaba la leit khmih ia kane ka skul, kala lap ba ka Tnad Education kala shu phai lyndet ia kane ka skul kumba kam don satia bad ia kane la sakhi na ka jinglong jingman jong ka skul ha kaba bun ki kamram klas bad ki tnum, ki ben ki dei ki bym ilong shuh.
Haba iakren bad ki Kmie Kpa jong ki Khynnah pule kane ka skul, kila pynpaw ia ka jingsngewdiaw bad sngew duhnong namar ka jingiehbein ka Sorkar ia kane ka skul, ka jingiehbein ka bym dei shuh tang ia ka jingtei, ki jingdon ki jingem, ki tiar ki tar hynrei wat ha ka liang ki ‘Paia’ (nonghikai) kiba pynsaphriang ia ka jingnang jingstad.
“Ka long kaba sangsot ba ka skul kala treikam tang da ka jingdon iwei I Nonghikai. Ngi da sngewnguh palat ia i..hynrei kane kam pynhun satia ia ngi namar ngi tip kam long kaba suk ba tang iwei I nonghikai in hikai ia ki spah ngut ki Khynnah naduh mynstep haduh da wai skul kata ruh manla ka sngi” kila ong.
“Ngi sngewbynniaw jur ia kane hynrei ngin leh kumno namar ngim kotbor ban phah ia ki khun ki kti sha kiwei pat ki skul kiba don sha jngai” kila bynrap.
