Shillong, Risaw 31 : U President ba thymmai ka Meghalaya NPP Bah Prestone Tynsong ha ka sngi Ba-ar, ula pyntip ba ka party kan sa pynbna noh ha u bnai ban wan (Naiwieng) ia ka kyrteng jong ki kyrtong ki ban mih aireng ha ka elekshon MP-Lok Sabha 2024 na Shillong bad Tura Constituency.
Haba iakren bad ki nongthoh khubor, u Bah Prestone ula ong ba ka jingpynkhreh ia ka elekshon Lok Sabha kala iaid shaid shaid mynta.
“Ka kam kala iaid mynta ha ki shnong ki thaw. Ngi la dep ban plan hynrei watla kala don ka jingkylla nongialam bad namar ba nga dang shu shimti mynta ka sngi ia ka kam President, kane kan ym long satia ka jingeh ia ngi namar mynta ngi ialong kawei kampher laka ei ka kynhun jong u Dr Kharlukhi bad kiei ki mat treikam kiba la buh sha baroh ki Nongialam, nga ruh ngan iaid lang ha kane ka juh ka lynti” ula ong.
U Bah Prestone u pyntip ba kila don bun ngut ki kyrtong kiba la wan iakren bad ka Party ban ai ticket.
Haba kylli lano ba u Nongialam ka TMC bad MLA barim ka Umroi Bah George B Lyngdoh un wan pyniasoh noh sha ka NPP, u Bah Prestone ula ong “Ka jingkhang jong ngi ka plie ia baroh kam dei kaba ngi leit iakren ma ngi ia u Bah George hynrei baroh ki wan iakren bad ngi. Kila wan iakren bad ngi bad mynta ngi dang shong bad pyrkhat ia kiei kiei baroh. Ngi dang lum ia ki jingtip ba bniah mynta la ka dei ha Tura Constituency ne ka Shillong Constituency”.
Halor ka Tura Parliamentary Seat kaba mihkhmat da ka Nongialam ka NPP Agatha K Sangma, une u President ba thymmai ka State NPP ula ong “Ka jingtreikam jong ngi kan iaid kat kum ka riti treikam jong ka party kam pher la ki dei ki MP ne ym dei hynrei ngi hap ban bud kat kum ka riti treikam”.
U Bah Prestone ula ong ba ka kam ba hakhmat eh jong u kum u President ka long ban thaw ia ki State Level Committee, District Committee bad ki Block Level Committee khnang ban lah pynkhreh bha ia ka party ha ka elekshon ban wan.
Haba iadei bad ka elekshon MDC, ula ong b aka Party ka dang shong pyrkhat mynta ia ki kyrteng jong ki kyrtong.
